Нульгидепки таткит
«Бутуннуль таткитва маначал – соткул урэдыкэль, нуӈалтын оныда и иргида орорво сатапкил, бэйӈальвэ бултадяпкил, нуӈартын соткул урэдыкэль одыhатыл, урэдыва бидэвэ салдыhатыл и утэльдувэр ульгучандыhатын…»
Гиркиль, су сарэс, бихин Тындинскай районду нульгидепки таткит (видеова ичэткэллю), урэдыкэль куӈакарду авалдяран?
Аван тар таткитту – буда куӈакарду элекэсипты образованиява энтыльнунмар бидядатын, одёлва и урэды бидэвэ садатын.
Нульгидепки таткит мирэдук дюр тыгинча нюӈун анӈанидук, Нюгдени таткитту базадун авалдяран.
Проект авторин доктор этнологии Александра Лавриллье, Парижскайва университетва манача.
Нульгидепки таткитту куӈакар таттяпкил эгданду, иду нуӈартын тыкин энтыльнунмэр бидэвкиль, а алагумнил нан нульгидепкиль, иду ородыкал бэел уринчэдэвкиль, бутунну таткит анӈанидун: бега умукон урикитту, ге унтуду. Алагумнул кэтэкун дуннэвэ оролдит ӈэнэвкиль, алагумнилду палатка биhин, электрогенератор, уллал, учебникиль, ноутбукиль, орапчавкиль алагумнил, эманэвкиль заданиялва, тадук эмэвкиль и ичэчивкиль он очал орандяриль.
Стандартнай таткитни программалин оранывкиль, эвэды бидэвэ алагудявкиль, англискай туранмэ, основалва компьютернай грамотностялван. Куӈакар он ида интернетля сатавкил. Оранывкиль лучады туранди, манни эвэды туранмэ энэ омӈоро, эвэды туранди манни бидэвэ алагувупкил, культурологиява, физическай культурава.
Тадук куӈакар он бидэ урэду салывкил, тара энтыльтын ульгучакиль: он оролво ичэтта, он бултада, сыргая и маутылва он ода саталывкил.
Нульги таткитва куӈакар-да, энтыльтын-да сот аявчал.
Эвэдыт дукуча Светлана Абрамовна Васильева, Нюгде бикит (Усть-Нюкжа, Амурскай область)
