«ХОТУГУ ФОРУМ»: АНААБЫРТАН ТӨРҮТТЭЭХ ЮРИЙ СПИРИДОНОВ ТУС БЫЫСТАПКАТЫН ТУРУОРДА

«ХОТУГУ ФОРУМ»: АНААБЫРТАН ТӨРҮТТЭЭХ ЮРИЙ СПИРИДОНОВ ТУС БЫЫСТАПКАТЫН ТУРУОРДА

«Талааннаах худуоһунньугум буоллар холустаҕа бу кэрэ көстүүнү суруйуом этэ», – диэн ураты көстүүнү, айылҕа кэрэтин көрдөхпүтүнэ бэйэбитигэр саҥа аллайабыт. Хоту дойду эриэккэс дьикти айылҕатын кэрэ матыыптарын, табаһыттар олохторун-дьаһахтарын, тыыннаах хаалар иһин туруулаһар хотугу киһи дириҥ бөлөһүөктүү өйүн-санаатын, дьиҥ ис кэрэлэрин киэн туттар биир дойдулаахпыт, РФ үтүөлээх худуоһунньуга, СР норуодунай худуоһунньуга, Анаабыр улууһун бочуоттаах олохтооҕо Юрий Васильевич Спиридонов холусталарыгар сөҕө-махтайа көрөбүт. Аан дойду бэрэстэбиитэллэрэ кыттыылаах Хотугу форум чэрчитинэн бу күннэргэ онлайн форматынан ыытылла турар конференцияҕа Юрий Спиридонов тус персональнай быыстапката https://nsdf.ru/выставки/ уонна бэҕэһээ СР судаарыстыбаннаһын күнүгэр арыллыбыт Арктикатааҕы культура уонна искусство государственнай института тэрийэр «Homo Mobilis.Айан суола» онлайн-быыстапкатыгар http//project2964411.tilda.ws/ сорох үлэлэрин туруорда. “Айан суола” быыстапкаҕа 17 араас көлүөнэ худуоһунньуктар хартыыналарын кытта билсэбит.

 

 

Тус быыстапката турбутунан эҕэрдэлээн туран кылгастык кэпсэтэ түһэргэ ыҥырдым.

 

– Бу мин аан маҥнайгы онлайн быыстапкам буолар. Бэйэм өссө эрдэ 1997 с. Хотугу Форум уопсастыбаннай академиятын чилиэнэ буолбутум. Манна кэлин оҥорбут үлэлэрбин туруордум, ол курдук: «Кочевье-1», «Кочевье – 2», «Портрет молодой оленеводки», «Портрет Иннокентия Слепцова («Знатные люди из Момы» серияттан)», «Портрет долганки в праздничной одежде» диэн саҥа хартыына сурулла сылдьар, «Под северным сиянием», «Хозяева Арктики. Нежданная встреча, семья белых медведей», «Зимой в стойбище», «Карибу. На Аляске» о.д.а.

 

 

«Үргэл» уус-уран галереябар өрүү да интэриэһинэй быыстапкалар буолаллар. Коронавирус кэмигэр даҕаны биһиги айар үлэбитин тохтоппотубут. Ол курдук галереяҕа онлайн режиминэн турбут ураты быыстапкалары эттэххэ, Өймөкөөнтөн талааннаах хаартыскаҕа түһэрээччи Семен Сивцев абстрактнай көрүүлэрэ, билигин «Саха» КИНХ биллэр тележурналиһа Иннокентий Слепцов үбүлүөйүнэн сибээстээн «Мой Якутск» диэн хаартыскаларынан айымньылара киирдилэр.

 

 

Биллэн турар, коронавирус дьаҥа тэрилтэлэргэ, чааһынай урбаанньыттарга элбэх киһи үлэтин-хамнаһын, олоҕун-дьаһаҕын атахтаата. Ол гынан баран бу дьаҥ-дьаһах көҥүл худуоһунньукка биллэрдик дьайбата. Тоҕо диэтэххэ, кини хаһан баҕарар бэйэтэ бэйэтигэр бүөмчү, дьонтон тэйэн олорон мастарыскыайыгар айар-үлэлиир. Холобур, тыйаатырдар, киинэ, кэнсиэрт көрөөччүтэ суох үлэлэрэ харгыстаммыт буоллаҕына, биһиги туох да оннук улаханы сүтэрбэтибит. Арай, аһаҕас быыстапкалар эрэ тохтоотулар. Онон, мин бу сылга даҕаны идэбинэн элбэх үлэни суруйдум.

 

 

Дойдубун кытары мин куруук сибээстээхпин, арай бу дьаҥ мэһэйдээн баар-суох тапталлаах эдьиийим суох буолбутугар да кыайан барбатым. Бүтэһигин төрөөбүт Үрүҥ Хайабар «Долган» саҥа культура киинэ аһыллыытыгар тиийэн дьоммун-сэргэбин көрсөн ахтылҕаммын таһаарбытым. Уруһуй кылааһын оҕолоругар маастар-кылаас биэрбитим. Бэйэм быыстапкам аһыллыытыгар Ил Дархан Айсен Николаев тиийбитигэр дойдум дьонун аатыттан бэйэм хартыынабын өйдөбүнньүк оҥорон бэлэхтээбитим. Хоту дойду аһаҕас сүрэхтээх дьонун, эриэккэй айылҕатын таптааҥ, умсугутуулаах айар үлэнэн дьарыктаныҥ, олоххо баар кэрэ түгэннэри таба көрөн сыаналыыргытыгар баҕарабын.

 

Гуннара БАЙГИЛЬДИНА.

Подробнее: https://ulus.media/2020/09/28/hotugu-forum-anaabyrtan-t-r-tteeh-yurij-spiridonov-tus-byystapkatyn-turuorda/

Написать комментарий

18 + десять =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ