Эвен биллиилээх суруйааччыта Мария Федотова-Нулгынэт Москваҕа Оҕо кинигэтин аан дойдутааҕы конгреһыгар кытынна

Балаҕан ыйын 10-12 күннэригэр Москва куоракка Оҕо кинигэтин аан дойдутааҕы 37-ис конгреһа буолан ааста. Конгреска 200 тахса дойдуттан оҕо суруйааччылара, кинигэ иллюстратордара, оҕо литературатын специалистара кытыннылар. Тэрээһин сорох чааһа онлайн форматынан барда. Конгресс аһыллыыта А.С. Пушкин Судаарыстыбаннай музейыгар ыытылынна. Дойду президенэ Владимир Путин эҕэрдэ телеграмматын ыытта, ону дойду салайааччытын культураҕа сүбэһитэ Владимир Толстой ааҕан иһитиннэрдэ.

“Биһиги дойдубутугар конгресс кыттааччылара – суруйааччылар, худуоһунньуктар, тылбаасчыттар, библиотекардар, преподавателлэр, суруналыыстар, кинигэни таһаарааччылар – кэлбиттэрэ үрдүк чиэс уонна улахан эппиэтинэс. Кинилэр оҕо литературатын таһаарыыга уонна тарҕатыыга үлэлээн, оҕолору билии умсулҕаннаах эйгэтигэр киллэрэн, дойду уонна аан дойду классикатын баай нэһилиэстибэтигэр, аныгы автордар бастыҥ айымньыларыгар кытыннаран биллэр уонна суолталаах кылааттарын киллэрэллэр”, – диэн суруллубут телеграммаҕа.

«Маннык судургута суох кэмҥэ Москваҕа оҕо кинигэтигэр анаммыт аан дойдутааҕы бөдөҥ конгресс ыытыллыбыта улахан дьоһуннаах түгэн буолар», – диэтэ президент сүбэһитэ.

Конгресс кэмигэр үс күн устата быыстапкалар, көрсүһүүлэр, оҕо кинигэтин аан дойдутааҕы сэбиэтин үлэтэ, куоҥкурустар, уопут атастаһыыта, о.д.а. ыытылыннылар.

Бу улахан тэрээһиҥҥэ  биһиги оройуоммутуттан эвен суруйааччыта, үөрэхтээһин туйгуна, В.П. Крапивин аатынан литературнай бириэмийэ лауреата, Муома оройуонун бочуоттаах гражданина Мария Федотова-Нулгынэт кыттыыны ылла.

Конгресс былырыын 2020 с. балаҕан ыйыгар буолуохтааҕын көһөрүллэн быйыл 2021 с. буолла.

Т. Слепцова, «Индигир уоттара» хаьыат, Муома

Также на Ulus Media: https://ulus.media/article/24290