Кыһыҥҥы суол арыллыыта эрдэлиэхтээх

Бу нэдиэлэҕэ оройуон дьаһалтатын уочараттаах мунньаҕар кыһыҥҥы суол тула кэпсэтии барда.

Ол курдук “ОДьКХ” ГУП Муоматааҕы филиалыттан кылаабынай инженер Георгий Алексееев Буор Сыһыыга оттуктара аҕыйах кэмҥэ баарын эттэ уонна өрүс нөҥүө суол арыллыытыгар хамсааһын тахсарыгар санаатын биллэрдэ.

Маныаха Индигир нэһилиэгин дьаһалтата суол тэрилтэтигэр анал сайаапканы оҥоруохтааҕа санатылынна. “Арктика суоллара” КТ Муоматааҕы учаастагын салайаааччыта Константин Терешкин сайаапка оҥоһулуннаҕына үлэлэһэргэ бэлэмнэрин иһитиннэрдэ. Улахан өрөмүөн үлэлэрэ түмүктэннилэр. Куораттан анал автоэлектрик специалист кэлэн үлэлээн барда. Бу күннэргэ Соболооххо сырыттыбыт. Бөһүөлэктэн 10-ча км тэйиччи сытар суол бүтүннүү колея буолбут, саас сырыы бүппүтүн кэнниттэн улахан кыамталаах массыыналар хаһан кэбиспиттэр.

Билигин ол туһаайыытыгар суолу тэҥнээһин, ыраастааһын үлэтэ барар. Тыаллаахтан Устуруук үрэҕинэн биэрэгиттэн биэрэгэр диэри тарыҥныы сытар. Олус сылаас күннэр тураннар, Индигиринэн, Муоманан барыта тарыҥныыр. Сайдыы туһаайыытыгар суолу арыйыахпыт, сотору бастакынан 3 т уйуктаах массыыналар көҥүллэниэхтэрэ.

Алтынньы 25 күнүттэн Сааһыыр туһаайыытыгар Буруустааҕынан Уус-Ньараҕа диэри суолга үлэ саҕаланна. Сэтинньи бүтэһигиттэн суол арыллыаҕа диэн сылыктыыбыт. Ол эрээри этиллибитин курдук быйыл саас хаһааҥҥытааҕар даҕаны суолу хаһан кэбиспиттэр, колея элбэх. Билигин техникалар бары бэлэмнэр. Техническэй көрүүнү ыытар массыына бэлэм, быйыл Чокуурдааҕынан, Муоманан үлэлиэхтээх. Бэйэбит бэлэмнээх специалиспыт анал үөрэҕи ааспыта. Ити массыына сааһыары Үөһээ Дьааҥы 4 нэһилиэгэр холонон үлэлээбитэ, этэҥҥэ бэрэбиэркэни ааспыта. Быйыл бу массыына биһиги улууспутугар кииннэнэн үлэлиэҕэ.

Оройуон баһылыгын э.т. Владислав Корякин быйыл кыһын саҥа балыыһа тутуутун матырыйааллара, ону ааһан оройуоҥҥа үлэлиэхтээх улахан уйуктаах техникалар Алдан территориятыгар кэлэргэ бэлэм туралларын санатта. Кыһыҥҥы суол арылынна даҕаны тиэйии-таһыы үлэтэ саҕаланыахтаах. Быйыл сааспыт уһаан, кырдьык, элбэх техникалар суолга хаалбыттара. Ол баар суол.

«Муома оройуона» МТ пресс-сулууспата

Подробнее: https://ulus.media/article/30639