Эйгысӄыкин таӈвагыргын

Эйгысӄыкин таӈвагыргын

Иӈӄун таӈвагыргын нынъэԓын Россиякэн эйгысӄык кытгынрыру ныԓгыӄин. Ӄԓиккин ыннатмытԓыӈӄэв гытгайъэԓгык 2020 гииӈитык гантомгавԓен стратегия ыттъыёԓягты таӈытвагыргын Эйгысӄыкин  варатнутэнут Россиякэн Федерации чама ямгавараткэн айыԓгаквыргын 2035 гээӈэтагнэты. Рымагтэты яаёԓӄыԓ гантомгавԓен государственнакэн программа. Ымыԓьэты каԓетъоԓомакавъё ӈотэн программагты 2021 – 2024 гээӈэты гэйытԓин Федеральнэпы бэджетгыпы 19,5 млрд кэԓитъуԓ. Нарантомгавӈынат торваӈэёт, нэрэнымкэвӈын майӈатгыргын инфраструктурак. Нарантомгавӈын нутэкин рыянотгыргын социальныкэн – экономическакэн майӈатгыргын. Госпрограммак кытрэву ныԓгыӄин майӈыкэԓитъуԓ вэнратгырго эйгысӄываратвагыргэты.

 Миӈкыри ынӄэн чемгъогыргын ратомгаты ыттъыёчагты ӈотэнгииӈитык?

 

Якутиякэн Эйгысӄэты нэрэнпириӈэнӈын миллиард пароԓ кэԓитъуԓ

 

Ӈотэнгииӈитык ымыԓьэты каԓетъоԓомакатгыргын рымкэвмайӈатгыргыкэн эйгысӄыякутиякэн чама эйгысӄываратвараткэн кэԓитъуԓ ратваа ыннэн млрд ӄԓиккин мынгыткэн ыннанмытԓыӈэн млн 430,5 тысяч кэԓитъуԓ, ӈыраӄычьэты мыкыӈ ваԓьын, 2021 гээӈэтгыпы…

Ынкэкинэйпы мыкыӈ ваԓьын мынгытӄԓиккин мытԓыӈӄԓиккин ӈирэӄӄԓиккин мынгыткэн млн кэԓитъуԓ — федеральныйгыпы казныйгыпы, 686 млн – республиканскийгыпы бюджетгыпы.

Якутскакэн кэԓитъуԓ, гивԓин зампред правительствакэн республикакэн Михаил Никифоров, нэрэнӈиивӈын эйгысӄыулусэты иӈӄун ынрэтын ӈэнри кимитъыт, ԓывээръын ынкъам материально – техническагты базагты инэнмэԓевыԓьырыкы.

Минвостокразвития вэтгыры вагъат гарегионма нэрэнӈивыӈын кэԓитъуԓ винрэту эйгысӄываратрамкэты КМНС, чама приоритеткэн проект рытомгавык инэнвилив-логистическакэн ценр (ТЛЦ) иӈӄун таӈыӈ кимитъырэтык эйгысӄыулусэты.

2022 гииӈитык нэрэтэйкыӈын ӈыраӄ ТЛЦ райцентрак Нижнеколымскак, Среднеколымскак, Верхоянскак ынкъам Жиганскак районык. Гэтэйкыԓин ынкъам гатыԓԓёпԓен ТЛЦ Абыйскак чама Усть-Янскак районык.

 

 

Ныриӈэмури Эйгысӄэты

 

Ыннэнӄэв ынпыԓювԓек 2022 гииӈитык ымыԓьо рэмкыт эйгысӄыкин районкэн Якутиякэн рэриӈэмъенӈыт Якутскатагнэты ынӄо рэпэԓӄынтэнӈыт ярагты гасубсидированма авиабилета. Республикакэн бюджета наракомпенсированӈын ӈыроӄӄԓиккин процентальа виԓивсуммайпы.

Торсубсидированияйпы нэнруԓтэтын ограниченият ынпъоравытԓьайпы, игыр билетат гаймаӈэн нэрэйминӈын ямга йъиԓгык гээӈэттагнэты ынкъам квотат рэӈаянвэты гэнмэйӈэвԓин ӈирэчьэпы мынгытычьэты ынкъам пароԓ ванвыт.

Ынӈин иквъи замминистр ԓейвынэӈэкин ынкъам ръэткин ӈавэтынкэн регионкэн Ольга Рафаилова, игыр Якутскайпы Хонутагнэты ӄԓиккин ӈыраӄ тысяч кэԓитъуԓ, гаймаӈэн рэпкирӈытык курык ӄонъачыӈкэн тысяч 900, Эԓгыӈайтагнэты курык мынгыткэн ӈыроӄ тысяч мытԓыӈӄԓиккин, Чокурдахтагнэты мынгыткэн ӈирэӄ тысяч 700, Черскотагнэты – мынгыткэн ыннанмытԓыӈэн тысяч мытԓыӈӄԓиккин кэԓитъуԓ. Рычечаватгырго иӈӄун льготныкэн билетата рэриӈэмъенӈыт ытръэч оравэтльат нымытваԓьыт улусык.

Коргаквыргын иӈӄун мургин эрым Айсен Николаев тыӈивынин региональныкэн парламентагты вэтгав субсидированиякэн авиаперевозкат гамгоԓен торгээӈэтгыпы. Эквырга ынӈин гаймаӈэн ивкэ ныриӈэмъетыркынэт Эйгысӄэты ымы ӄутти нымытваԓьыт регионтэ, мытив ымы ытри нынымытваӄэнат ынӈэн республикак. Юрэӄ ыттъыёԓягты таӈыӈ ратваа.

 

Субсидият ӄорагынрэтыԓьэты. Ръэнут нытуръэв нъэԓгъи?

 

Минсельхоз республикакэн нанымӈыԓявыркынэмык иӈӄун ӈотэнгииӈитык субсидият ӄорагынрэтыԓьырыкы эйгысӄыкин улусэты нэрэйминӈынэт чама нэрэрэнӈынэт пагтыԓгыяраӄагтэ, квадракоптертэ ынкъам нэрэтэйкыӈынэт караԓтэ. Федеральный бюджетгыпы нэрэюнрыӈын ӄԓиккин мынгыткэн ӄонъачыӈкэн пароԓ млн кэԓитъуԓ.

  Ынӄэн ымыԓьо томгатгъэ вэтгычьато нэԓгыгъэн правительствота регионата ынкъам Министерствота развитияк Дальныйкэн Востокык ынкъам Эйгысӄын. Ынӈинкин вэнратгыргын Минвостокразвитияйпы Эйгысӄык рээн ратваа тэӈвытку.

  Игыр ынанмайӈычьын аграрныкэн штаб Якутияк нынтомгавӄэн положения, миӈкы нэрэтэйвыӈнин субсидият традиционныйкэн отрасли эйгысӄывараткэн. Игыр Минсельхозык мынгыткэн ӈыроӄык районык нываӈэӄэнат 700 ӄорагынрэтыԓьыт.

 

                 Пыӈыл кэԓинин Равтыӈана

Фото: Интернет, ЯСИЯ

Написать комментарий

четыре × три =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ