Он бималам Благовещенскайду

Он бималам Благовещенскайду

Благовещенскла городук гэладитяв истави. Эдави? Эттыки нулгистян минни аяври гиркив кэргэннюн. Окин  гиркив нулгистян би ангадяканвачин отяв. Тар, эр аннганиду минни кутув эмэвдэн Благовещенскла. Бакалдым гиркилнюн. Урунчудюмнун. Ала- тала минэвэ нгэнэвкандерэ, эматанылва дивилва ичевкандерэ. Со гудяй Благовещенск, со огды эр город. Биракун Амур гунмури багдаргадярэн, донгкототя, эридерэн аракукан. Баргидадун Китайкун ичевдерэн. Дюкур Китайнил ичевдерэ давама. 

 

Эвенкилнюн, эду индерилнюн ичелдымудянэ, бакалдымудянэ дукутяв  интернетту: «Эмэм Благовещенскла. Ни минэвэ ичемудярэн, ни бакалдымудярэн?».  «Ни-кет долдыдинган» — дялдадям би. Долдырэ! Дукурэ! Аяке! Уруным сот. 
Ольга Морозова — алавумны матал туранвэтын, савдери аси минэвэ арирэн Амурский государственный университетла. Арирэн минэвэ аят кэняденэ, аяткул турарди. Урунывканэн минэвэ:» Синнил савдерил дукувурвэс, давларвэс дукудингавун видеостудияду. Кунгакарду, илмакталлу алавувдярилду долдыдатын синни эведы дукувурвэс»- гунэн. 

Он-ка? Би имат гам итывававтя дукувурви, конгактави, кордавунви, конгкавурви. Гиркив машинат исивканэ университетла. Таду минэвэ алатчерэ Ольга Морозова  — алавумны матал туранвэтын, Светлана Васильева — алавумны эведы туранвэ нулгиктэдерилду кунгакарду, Наталья Яковлева — садери туранвэ, со гудяй эвенкимны. Бакалдырэв кумнуматнэ городук савдерилвачин. Тадук нгэнэвдэ видеостудияла. Таду мутвэ алатчерэн Олег Александрович Лештаев. Со ая звукооператор. Аят сарэн хавави, ачука, сарэн он илэлнюн улгучаматтави. Студиякун огды, ая. Би энэ экунада нгалэттэ улгучам окиндук, эдан дукулчав.

 

Амтылвэв иннгавэтын, иннгави улгучаным. Давларви давлам, дукувурви, элви… Дюр часкун илтэнэ ундэк. Эвенкимныл инямудянэ долчатчарэ. Би-да уруным. Эдук дюласки миннил дукувур эдингатын омнговдо. Эвенкил эматаныл дундэлду индерил долдыдингатын.

Тувидат эведы туран эдинган сокоривда, омнговдо.
Омнгом дукудави: минду анытятын со ая анывунва — » Нымнгакар эведы эняканни «- «Сказки эвенкийской бабушки «
Со ая, со гудяй дукувун. Урунывкарэ.

 

Валентина Волкова, Алданскэй район, Ленинский урикит

 

Написать комментарий

18 − 5 =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ