Иван Слепцов саҥа технологиялары үлэҕэ туһанан табаһыттар үлэлэрин чэпчэтэр соруктаах

Иван Слепцов саҥа технологиялары үлэҕэ туһанан табаһыттар үлэлэрин чэпчэтэр соруктаах

Абый улууһа тыа хаһаайыстыбатын үс тутаах салаатынан – ынах сүөһү, сылгы, таба иитиитинэн тэҥҥэ дьарыктанар ураты оройуон буолар. Таба иитиитэ кэнники сылларга көрдөрүүтэ мөлтөх. Хоту дойду маанылаах кыыла биир кэм 60 ахсааҥҥа турар. Маны оройуон дьаһалтата болҕомтоҕо ылан, былааннаах үлэни саҕалаата.

Бу күннэргэ Абый улууһун баһылыга Станислав Цюхцинскай, тыа хаһаайыстыбатын управлениятын начаалынньыга Михаил Ефимов, бааһынай фермерскэй хаһаайыстыба баһылыга Иван Слепцов, Муҥурдаах нэһилиэгин баһылыга Олег Корякин уонна үөрэҕирии управлениятын начаалынньыга Сергей Мартынов Усуйаана улууһугар баран уопут атастастылар, таба иитиитин үлэтин-хамнаһын билистилэр.

Салайааччылар үс күн устата үгүс сүбэни-аманы ыллылар, инникигэ сыалаах үлэни ырытыстылар. Түмүгэр икки баһылык таба иитиитигэр бииргэ үлэлэһэр туһунан Сөбүлэҥҥэ илии баттастылар.

 

«Таба-Яна» кэпэрэтииптэн 500 табаны атыыластыбыт. Мантан сүүһэ үөҥэс (3 саастаах таба), 100 тугут уонна 300 төрүүр таба. Төлөбүрэ 100% ааспыта.

2021 сылтан саҕалаан ыаллыы сытар Усуйаана улууһуттан таба атыылаһар туһунан кэпсэтии ыытыллыбыта. Сүбэлэһэн баран икки хаһаайыстыба докумуонун куонкуруска биэрбиппит. Кыайыылааҕынан Оттоох Атах учаастагар өбүгэ төрүт дьарыгын тутан олорор, сүүһүнэн ахсааннаах сүөһүлээх Иван Слепцов тахсыбыта. Таба иитиитэ төһө да атын хайысха буоллар, Иван Иванович үлэлиир баҕалаах, таба ахсаанын элбэтэр былааннаах. Республикаҕа соҕотох ынах, сылгы, таба иитэр хаһаайыстыба буолуо.

Табалары Сыаҥааннаах сиригэр Томмот Түбэҕэ иитиэхпит. Сэбиэскэй кэмҥэ манна 4 тыһыынча кэриҥэ дьиэ табата иитиллибитэ. Усуйаанаттан да чугас.

Усуйаана уопуттаах табаһыттара табаны хайдах олохсутары, бу салааны хайдах сайыннарары сүбэлээтилэр. Бастакы бириэмэҕэ билэр, сатыыр дьон дьарыктанара ордук, онтон сыыйа олохсутуҥ диэтилэр.

Онон табаларбытын аны күһүҥҥэ диэри көрүүгэ-харайыыга хааллардыбыт. Муус устар ыйга төрүөх күүтэбит. Маны сэргэ Томмот Түбэҕэ көс олохтоох Дмитрий Ефимов дьиэ кэргэнэ кэлэн көрөрүгэр кэпсэтии барда.

Билигин сүрүн сыалбыт – табаны иитэргэ усулуобуйаны тэрийиэхтээхпит,

хааччыллыы боппуруоһун быһаарыахтаахпыт. Бу хаалбыт бириэмэҕэ дьукаахтыы сытар улууспут дьонун сүбэтинэн табаһыттарга анаан дьиэ, таба хараала тутуллуо. Бу боппуруоһу быһаарса тыа хаһаайыстыбатын управлениятын начаалынньыга Михаил Ефимов Дьокуускайга командировкаланна», — диэн Станислав Цюхцинскай кэпсээтэ.

 

Иван Слепцов: «Усуйаана улууһугар баран үлэни билсэн кэллибит. Таба иитиитэ биһиэхэ сайдыан сөптөөх салаа, толкуй баар. Республикаттан көмө улахан. Тыа хаһаайыстыбатын министерствота 5 мөл. 440 тыһ. солк. көрдө. Бэйэм бюджеппыттан 1 мөл. 360 тыһ. солк. эбэммин 500 төбө табаны атыыластым. Аны сылын аайы РФ тыатын хаһаайыстыбатыттан биир төбөҕө 8 тыһ. солк көрүллэр, ол аата 4 мөл.солк. биэрэр. Сүрүн ирдэбилэ табабытын 500 төбөттөн аччатыа суохтаахпын, сайыннарыахтаахпын. Үлэһиттэрим хамнаһа мантан тахсар, ыйга табаһыкка 300 тыһ. солк. төлөнүөҕэ. База тутуутугар эмиэ субсидия көрүллэр. Аны эт, тыс, муос атыылаан, эмиэ дохуот киллэриниэххэ сөп. Онон үлэлииргэ көҕүлүүр күүс баар.

Мантан 2-3 киһини наймылаһан үлэлэтиэм. Сүөһү иитиитигэр киһи сайыннары, кыһыннары күнү супту үлэлиир. Оттон табаны харахтан сүтэрбэккэ көрүөххэ уонна үчүгэй усулуобуйа олохтуохха эрэ наада диэн сүбэлээтилэр. Бириэмэ биир сиргэ турбат, техническэй прогресс, сайдыы баран иһэр, аныгы үйэҕэ таба иитиитин кыайыахха сөп. Маршрут оҥостуом, буран, квадрокоптер атыылаһыам. Итини таһынан табаны чиптээһин үлэтин былааннаатым. Оччотугар көс олоххо саҥа технологиялар киирдэхтэринэ табаһыттар үлэлэрэ чэпчиэхтээх. Усуйаана баһылыга Георгий Федоров, «Таба-Яна» кэпэрэтиип атахпар туруохпар диэри көмөлөһүөх буоллулар. Ынах, сылгы төрут аҕыйах эбит, таба иитиитигэр охтубуттар. Ынах, убаһа этин атыылыырга кэпсэттим.

 

Саас ыстаадаҕа баран ааҕыам. Ортотунан 150 төрүөҕү күүтэбит.

Аныгы үйэҕэ куттаммакка, чаҕыйбакка, үлэлиэххэ наада. Улууска спорт элбэх көрүҥүгэр бастаабыт киһибин. Ол иһин да буолуо, олоҕум устатын тухары кыайыы эрэ туһунан толкуйдаахпын. Хотторорбун сөбүлээбэппин. Олох диэн эмиэ саахымат курдук, эрдэ биир хардыыны оҥоро сылдьыахха наада».

Александра Заровняева, Хотугу кыым (Северная искра)

Абый улууһа

Подробнее: https://ulus.media/article/42722

Написать комментарий

один × 4 =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ