Абыйдааҕы «Якутоптторг» филиала аһынан-үөлүнэн хааччыллан олорор

Абый улууһун атыы-эргиэн логистическай киинигэр нэһилиэнньэ күннээҕи наадыйар аһылыгын бородууксуйатын саппааһа баар диэн «Якутоптторг» оройуоннааҕы филиалын дириэктэрин э.т. Анна Черемкина иһитиннэрэр.

– Социальнай суолталаах бородуукталар сөптөөх саппаастара баар. Бу күннэргэ ас-үөл хамаҕатык барда. Атыылаһааччы үксээтэ. Холобур, кулун тутар 2 күнүгэр 241 киилэ саахар, 115 кг бурдук, 54 кг мас арыыта, 77 кг ириис курууппа, 41 бааҥка эт кэнсиэрбэтэ атыыланна.

Ордук ыраах сытар нэһилиэк дьоно аны кыһыҥҥы суол аһыллыар диэри аһыыр астарын ылан хаһааннылар.

Бу күннээҕи туругунан ыскылаакка 14,800 тн саахар, 145,1 тн бурдук, 3,37 тн ириис курууппа, 6,3 тн туус, 0,6 тн мас арыыта, 4,8 тн эт кэнсиэрбэтэ, 0,7 тн. макарон арааһа о.д.а. ас-үөл баар.

Сыана үрдээһинэ суох. Маны «Якутоптторг» салалтата күннэтэ хонтуруоллуу олорор, — диэн кэпсээтэ Анна Черемкина.

Кулун тутар ыйга кыһыҥҥы суолунан былаан быһыытынан 70 туонна социальнай суолталаах ас тиэллэн кэлиэ. Маны таһынан саппааска баар ас кыһыҥҥы суолунан нэһилиэктэргэ тиэрдиллиэ уонна оройуон киинигэр хаалыа. Күһүҥҥү навигацияҕа диэри сүрүн наадалаах ас саппааһа тиийэр.

Ил Дархан Айсен Николаев сорудаҕынан билигин өрөспүүбүлүкэ үрдүнэн ас-үөл баарын-суоҕун, сыана үрдээһинин хонтуруоллааһын күннэтэ бара турар. Бу туһунан улуус баһылыга Станислав Цюхцинскай маннык кэпсиир:

— Улууска ас-үөл ырыынагар сыана уларыйыытыгар ыстаап тэрилиннэ. Ыстаап оройуоҥҥа сыана уларыйыытын кыраҕытык кэтээн көрүөҕэ, сыана уларыйдаҕына уонна табаар суох буоллаҕына суһал быһаарыылары ылыаҕа.

Урбаанньыттар кыһыҥҥы суолу баттаһа табаардарын аҕалан эрэллэр.

Александра Заровняева, «Хотугу кыым» (Северная искра) хаhыат, Абый улууhа

Подробнее: https://ulus.media/article/44703