Ньобати накатьйакан Томпа балданҥа буги гэлэддэн

Дьуллэ мут эрэк Томпа дьугулин дукрит ,тарав Томпо районни Джибарики Хайадук тысяча километрла биддивэн бакчавутан.

Ньока буган Минэкологиян бэлнэдьин дьэлгэнкэв  «Орто дойду» зоопарктикин эмуритэн. Һуу, таҥамҥал, дьооҥчича бидьис накат гэрбэгэн оон һинмачавутан. «Активный гражданин» гэрбэ сайтли ҥаалур тиниритэн накат гэрбэн Томка окат гэрбэдьин бидэн, дьэлгэнкэв тадук бакритан теми.

Гиадмар накат Колымана-дэмэр «Орто дойду» Зоопарклан ииндьиддэн. ГТРК ”Саха” сетьлэн видиоли ичун ньан Колымана, зоопаркла көйэтнэми эмчэ бэилтэки, качиками (һути) Харчаанав ичукэчиддин. Тиик Хаарчанав Санкт-Петербург зоопаркалан иччиснэн.

Амаргаг һээду һуланьа книгала бисил дьэлгэнкэр бэй ииндьиддин билэкэлдулэ иивэтиттэн һойалбун. Һэргэг колума райондулан биологическай ресурсан дирекциян госинспекторални ньобати накаталдули мониторингав оолдаҥатан гораллан.Тачин-ту мут ньимэкэлдулэт Магадан областилан ньан таррочин гургэв ҥэнуддэ.

“Это интересно”( эрэк һэбдьэнь) рубрикадук: эври миир дьөөр миар надан инэҥин Төөр ойлин Нунмирэл доолитан ньобати накат иинэҥиҥэн илкэбгэрэн (lntrnational Polar Bear Day).

“Анҥантан эрэк инэҥиду мокиҥав оддьаддил ньан экология  организациялни иртэн гургэлбу ооватта.  Ноҥартан имкачиндьитан эрэк планетала дьэлгэнкэлдук авугдукутан-да эгдьэҥмэтэн накату аавдататан, одьадатан,” — мэтуттэн Россия МинЭкологиян.

Аят Саттаров дукран.

Эрэв ньучидиван эли-дэ таҥми элэкэн

Картускала типкэттэ госинспекторалдук огиҥэтэн Руслан Слепцов ньан натуралист Марсела ван Остен “Ледяной король”

Эвэдилэ тулматтан З. Степанова