Айар тыл аҕата Өксөкүлээх Өлөксөй төрөөбүтэ 145 сылын бэлиэтээтилэр

Айар тыл аҕата Өксөкүлээх Өлөксөй төрөөбүтэ 145 сылын бэлиэтээтилэр

Доҕордоһуу болуоссатын киэҥ нэлэмэн түһүлгэтигэр саха суругунан уус-уран литературатын төрүттээччи, саха омук духуобунай лидерэ, поэт, чинчийээччи, бөлүһүөк Алексей Елисеевич Кулаковскай-Өксөкүлээх Өлөксөй төрөөбүтэ 145 сылын бэлиэтээтилэр.

 

Дьоро тэрээһин үөрүүлээх чааһын Дьокуускай куорат аҕа баһылыга Евгений Григорьев эҕэрдэ тылынан арыйда. Евгений Николаевич Саха сирин олохтоохторун айар тылбыт аҕатын төрөөбүт күнүнэн сахалыы сайаҕастык уруйдаата уонна Өксөкүлээх Өлөксөй сыдьааннарыгар истиҥ, иһирэх санаатын тиэртэ.

 

Салгыы эҕэрдэлэргэ Ил Түмэн хотугу аҕыйах ахсааннаах норуоттар боппуруостарыгар уонна дьыалаларыгар сис кэмитиэтин бэрэссэдээтэлэ Елена Голомарева, «Чолбон» уус-уран литературнай сурунаал бас эрэдээктэрэ Гаврил Андросов, «Таатта түмсүү» бэрэссэдээтэлэ Владимир Аржаков, П.А. Ойуунускай аатынан государственнай саха академическай театрын сүрүн режиссера Руслан Тараховскай кыттыыны ыллылар, бэйэлэрин норуоттарыгар баҕа санааларын уонна бүгүҥҥү дьоро күнү кытары ситимнээн Саха АССР тэриллибитэ 100 сылынан эҕэрдэлэрин тиэртилэр.

 

СӨ норуоттарын, ыччатын ассамблеятын чилиэнэ, Саха сиригэр Таджикистан государствотын диаспоратын баһылыгын солбуйааччы Фаридун Котанов Өксөкүлээх Өлөксөй «Оттоку олук алгыһа» хоһоонуттан быһа тардан, бэйэтин омугун тылынан ааҕан иһитиннэрдэ. Санатар буоллахха, Алексей Елисеевич билиитин, интэриэһин киэҥинэн түүр омук бэрэстэбиитэллэрин кытары үлэлэһэн испитэ. Татарстан Өрөспүүбүлүкэтин олохтооҕо, тюрколог, Казаньнааҕы Императорскай университет профессора, фольклорист Николай Федорович Катановтыын ыкса сыһыаны олохтообута. Онон, бүгүн сахалыы алгыс таджик норуотун тылынан маҥнайгытын сүрэхтэммитэ – оруннаах курдук буолан таҕыста.

 

Өксөкүлээх Өлөксөй улахан сиэнэ, РФ уонна СӨ культураларын үтүөлээх үлэһитэ, РСФСР норуотун үөрэҕириитин туйгуна, Уус Алдан улууһун, Бороҕон уонна Суотту нэһилиэктэрин бочуоттаах олохтооҕо, меценат Раиса Реасовна Кулаковская Сахабыт сирин салайааччыларыгар, учуонайдарга, суруйааччыларга уонна кинилэр ааҕааччыларыгар, биир дойдулаахтарыгар – таатталарга, ону таһынан бука бары мустубут дьоҥҥо махталын биллэрдэ.

— Кыахтааҕым буоллар бука барыгытын кууһан ылыам этэ, — диэн үөрүүтүн үллэһиннэ. Раиса Реасовна педагогическай институт саха тылын салаатын бүтэрэригэр дипломнай үлэтин тематынан Улуу эһэтин олоҕун, үлэтин уонна кини эйгэтин үөрэппитин туһунан санаата. Үлэтин суруйар кэмигэр Москва куоракка тиийэн, 1917 сыллаахха Саха сиригэр революцияны ыстыык тутан олохтоспут, оччотооҕу хорсун кыргыттары, кэлин государственнай таһымнаах биэнсийэҕэ олорор Дора Жиркованы уонна Муся Потапованы көрсүбүтүн аҕынна.

 

Бүгүҥҥү үөрүүлээх, Өксөкүлээх Өлөксөй төрөөбүтэ 145 сылын бэлиэтиир дьоһун тэрээһин түмүк чааһынан, мустубут дьон улуу суруйааччыбыт мэҥэ тааһыгар сибэкки дьөрбөтүн уурдулар, айар тылбыт аҕатыгар бүттүүн сүгүрүйдүлэр.

Тэрээһини Дьокуускай куорат «Таатта» түмсүүтэ иилээн-саҕалаан тэрийдэ уонна бар дьонугар тэниттэ.

Утум Захаров

Подробнее: https://ulus.media/article/46328

Написать комментарий

двенадцать − пять =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ