ЮБИЛЯРДУ 110 АНӇАНИН. Эвэды пьесавэ омни

Хэгды дата эвэды пьесавэ «Алтанэй» дукумниду эси оча, нямади дян анӈанин. Гэрбин эр авторва Ксения Ивановна Воронина. Хэгды датан эр анӈаниду очан. 

Ксения Ивановна бикитту Ботакина Иркутскай областьту 1912 анӈаниду балдычан. Амтылин-эвэнкил бираякардули Чайка, Чуя, бира Лена дяпкадутын уринэденкитын. Агиды хавадук дэрукичэденэ, энинин Агриппина Тимофеевна Салаткина хутэдуви нимӈакарвэ, улгурилвэ улгучэнденкин. Тарит куӈакандук Ксения, долдыналви нимӈакарвэ, дукулчан. 1934 анӈаниду Лениӈрадскай Северды институтва маначан. Ксения Ивановна Красноярскаду, Эвенкияду, Таймырду алагумнит, журналистат, культработникит хавалдячан.

Таргачин нимӈакарвэ «Сулаки, чипичакан-да», «Атыркан, хомоты, кулин-да», «Асаткан Нэкуе», «Асаткан Маӈими», «Орокто Потовье», «Борболен», «Экнил», «Мэргэнчэ», «Аси тадук бадялаки», халвэтын-да тэгэлдук долчатчачан. Эр аси сот эвэдывэ интеллигенциява угирдечэн. К.И.Воронина хэгды хававэ, музыкальнай-драматическай пьесавэ «Алтанэй» дукучан.

АЛТАНЭЙ

Алтанэй – тар герой эвэды музыкальнай-драматическай пьесаду. Нуӈан беснаилва тэгэлвэ элбэтчэчэн, эрурнун
баилнун кусидечэн. Баил бэел Няӈненай, тадук Болонтур хавамнилвар болгинкитын, хуӈтулду урикитылду илэлвэ тырэденкитын. Алтанэй гиркинунми Сэлэнтурнун нуӈарватын давдычан. Туги-дэ эвэнкил Алтанэйва хэгды иргэндулин-дэ, дучама эмугдэлин-дэ сот аявдечатын!

Экумадук дуннэедук,
Алтандер, екиндер!
Няӈняядук, ламуядук,
Алтандер, екиндер!
Кутуявун си эмэчэс,
Алтандер, екиндер!
Толкинду-гу, тэдеде-гу
Алтандер, екиндер!
Дылачагэчин хачилчас,
Алтандер, екиндер!
Чипичагэчин чуллилчас,
Алтандер, екиндер!
Эӈэсис му мусундук хэлэн,
Алтандер, екиндер!
Инэвун аяя бунни,
Алтандер, екиндер!
Илэлди энэл таӈивра,
Алтандер, екиндер!
Няӈненайду хавалдярав,
Алтандер, екиндер!
Тыкин синду ункерорав,
Алтандер, екиндер!
Аят индэс гэлэдерэв,
Алтандер, екиндер!
Бинидувун хачидядас,
Алтандер, екиндер!
Сэвдемэмэт икэдеӈэт,
Алтандер, екиндер!

Ксения ВОРОНИНА