Быйылгы Бакалдыҥҥа хаһааҥҥытааҕар да эдэрдэр кыттыбыттара үөртэ

Быйылгы Бакалдыҥҥа хаһааҥҥытааҕар да эдэрдэр кыттыбыттара үөртэ

Бэс ыйын 3-5 күннэригэр Дьокуускайга Бүлүүлүүр тыраак 43-с км “Бакалдын” (эбэҥки тылыттан «көрсүһүү») эбэҥки норуотун төрүт бырааһынньыга үрдүк таһымҥа ыытылынна. Быйылгы Бакалдын Кэнкэмэ үрэх кытылыгар тутуллубут саҥа этнокомплекска буолла. Өлөөн улууһун салалтата тэрийбит бырааһынньыгар сиэр-туом, бастыҥ таҥас, национальнай куукуна куонкурустара, ыччат төрүт оонньуулара киирдилэр.

 

«Бакалдын» эбэҥки төрүт бырааһынньыгыттан Анаабыр улууһун делегациятын салайааччыта Мария Попова билиһиннэрдэ:

— Киэҥ далааһыннаах үгүс саҥа тэрээһиннэрдээх Бакалдын күнүгэр эбэҥкилэр түөлбэлээн олорор бары улуустарыттан делегациялар олус көхтөөхтүк кытыннылар. Ыччакка аналлаах “Бэркэ Бэе-2022” күрэххэ 8 уол илин-кэлин түһүстүлэр.

 

Анаабыртан Артикатааҕы судаарыстыбаннай культура уонна искусство институтун уруһуй уонна уус-уран оҥоһук салаатын үһүс курсун устудьуона Күндүмэн Андросов «Көрөөччү биһирэмин” ылыан ылла, хас да диплом хаһаайына буолла. Өлөөн баһылыгын Лена Степановна Иванова илиититтэн 20 тыһ. сертификат тутта.

 

Анаабыр баһылыгын Эдуард Платонов аатыттан 15 тыһ. сертификат тутан үөрүү өрөгөйүн биллэ. Оттон «Аякчана-2022» диэн кыргыттар күрэстэригэр сэттэ кэрэ кыргыттар кииристилэр. Анаабырбытыттан Дьокуускайдааҕы медколледж устудьуона Амелия Афанасьева бэйэтин холонон көрдө. Түмүккэ анал номинация ылан тостер бэлэх тутта итиэннэ улуус баһылыгын Эдуард Платонов аатыттан 15 тыһ. сертификат харчы тутан үөрүүтэ үрдээтэ.

 

 

Бу “Аякчана-2022” күрэххэ табаһыт, булчут өбүгэлэрдээх Хатыстыыртан сылдьар биһиги биир дойдулаахпыт Валя Стручкова кыайан тахсыбыта. Быйылгы Бакалдыҥҥа хаһааҥҥытааҕар да эдэрдэр кыттыбыттара иннибитигэр эрэл кыымы саҕар.

 

«Алтама уняптун» (Кыһыл көмүс сүүтүк) диэн иистэнньэҥнэр күрэстэригэр уонча уус тарбахтаахтар кыттыбыттарыттан Антонина Петрова «Боруонса сүүтүк” анал аат хаһаайката буолла. Россия телевидениетын канала кини тикпит национальнай таҥастаах куукулаларын олус сэргээн уһулла. Саанан ытыыга бэргэнник ытан Саргылана Туприна 3-с миэстэни ылыан ылла.

 

Аны биир дойдулаахтар түмсүүлэрин бэрэссэдээтэлэ Евдокия Туприна маамыкта быраҕыытыгар 2-с миэстэ, Үрүҥ Хайаттан Элеонора Туприна маамыкта быраҕыытыгар кыайыыны аҕалла, наарта ойуутугар 2-с миэстэни ылан Анаабырдар дойдубутун ааттаттыбыт. Салгыы эбэҥки норуотун ырыаларын ааптара Надежда Докалова ырыатын күрэҕэр, мин II степеннээх дипломат буолан олус үөрдүм.

 

Аны Саргылана Семеновна Туприна салайааччылаах «Тэбэй» трио эдэркээн ырыаһыттара Яна Боярская, Карина Усова, Тома Николаева кыттан улахан сэҥээриини, кэрэхсэбили ыллылар. Онон олус сэргэхтик уонна түмсүүлээхтик сылдьан кэллибит. Ыаллыы сытар Өлөөн эбэҥки национальнай оройуона үрдүк таһымнаахтык тэрийбититтэн астынныбыт.

Аныгыскы Бакалдыҥҥа көрсүһүөххэ диэри!

Гуннара Байгильдина

Подробнее: https://ulus.media/article/60219

Написать комментарий

2 × 5 =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ