Михаил Лукачевский : «Гуум тыкоргавык, гымнан тыльуан пыллиңыльын!» Эвытлым рэқу етгъи мэтр екутыльыкин кино Экулымэгти

Михаил Лукачевский : «Гуум тыкоргавык, гымнан тыльуан пыллиңыльын!» Эвытлым рэқу етгъи мэтр екутыльыкин кино Экулымэгти

Лыги вальын екутыльыкин кинорежиссёр Михаил Лукачевский, плыткунин вторникык чиниткин ваңэё Черскиек.

Ытлён нываңэқэн студияк «Сайсары Синема», ынык рээн гээтлин оператор Серафим Фёдоров. Акватыңок ңотқэн группан гэетлинэт редакциягты газетан «Колымская правда».

 

 

Ымыльорык лыги, игыр екутыльыкин кинематографиян тэвмэчынкы варкын. Амалваң вальыт фильмат нытэйкықинэт Якутияк, кинок нытэнңэвмури, ныкоргавморэ, ныпынэвмури, нычемгъотваморэ вагыргэты.

Творчествальыт оравэтльат екутыльыкинок нымкықин, ытръэч уйңэ кэлитъул (мынгыкват) тэйкык проектат ыттъыёлягты.

Итыкэвын варкыт грантовальыт конкурсат, ытръэч нылвавқэнат амқынъычо винрэтык. Мургинэт кинематографистат нылвавқэнат ынкы вак участие — қэлёкъым требованият ынкы вальыт ытръэч майңыстудията гаймаңэн нэрэтэйкыңын. Торкинематографистат амалваң вальык субъектайпы Российскакэн Федерацияйпы нытэйкықинэт рычемгъовъё вагыргэты, гантомгавлен Фонд винрэту региональныйкэнат кинот. 

 

Винрэтгъи ынқэн фонд ымы Михаилына Лукачевскийына  ваңэнво нылгықин торпроект. Пыңылтэлгъэ торкино тайкыё :

Игыр моргынан нинэтэйкымури документальный кино «Ивыткинэт Эйгысқыкинэт пыллиңыльыт», виин ынңин нынныльын, ыттъыёлягты мытрантомгавңын поэтическакэн нынны.

Мурыгкинок мытлыңэн киноновеллат, мытлыңэн пыллиңыльыт, ыннэн лыги вальын учёный Никита Сергеевич Зимов.

 

Тэнмавма акватынвэты Нижнеколымскакэн районэты, моргынан мытылвавын льук билеттэ Черскийгыпы Якутскагты, мэткиит мытбилетынңамык.

 

Тэвмэчынкы мытваңэмык Нижней Экулымэк. Вэлынкықун Никитана Зимовына чама винрэтыльатгъи, мытлейвымык Амбарчикэты, Дуванный йъынрэты, мытваңэмык Плейстоценовык паркак. Ңутку нымкықин гэчевкы вальыт ванвыт. Отчыкочормын, миңкы утчыкун нытэлпықин рымавтэты эллық. Ңутку амалваң вальыт  природно — климатическакэн районтэ, амалваң вальын нутэнут. Мури мытпаңъэвңытомык, колё нымэльэв мытъйылқэнмык!

 

Гуум ныкоргавэгым, иңқун ңанқо мытъенмык чама Никита Зимов қэглынангэт пыллиңыльыт таңоравэтльан, нинэтэйкықин таңваңэё. Гэмэтивэтигым янор, қэтэв варкыт ынңин вальыт оравэтльат! Гуум тыкоргавык льуулгык пыллиңыльык рээн!

 

Игыр нычемгъотвайгым мэчынкы этықон тъэркин мыттэйкыан материал, эвыр ратъарычваа, нэмэ мытрээнмык. Нымкъэв мынъысниматын нымным Черский. Тэвнымэльэв гитэк эйгысқынымным, чичевкы проблемат. Ивкэ сниматык тинтин, қырирык ванвыт, рыкалыровыльыт алва нъэлыльын омаквыргэпы нутэнут.

 

Ымыльорыкы, микынэ гынрыру нинэлгықин кино Якутиякэн, нынны Михаилын Лукачевскиенинлыги нылгықин. Ытлён режиссёр, продюсер чама актёр. Ынин фильмат лыги киносообщесствак ынкъам ганаградальыт ымы республикак,  Российскак Федерацияк, ымы ыяанотак (за рубежом). Ыннэн ынин ынңытэқин кино — «Вертолёт» (2021). Қырым мынынлымңылявын, ытръэч — ым қыгитэгыткы ынқэн кино.

 

Алексей КУРИЛО (Виилыгтын авторынэн)
«Колымская правда»

Гэйилыльэтлин Равтыңана

Написать комментарий

двадцать − восемь =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ