Бакалдын Усть-Нюкжаду

Уруным. Аякэ! Долдым: Усть-Нюкжаду одиҥан дюрдяр анҥанити Бакалдын. Окин-да атяв бира тар дундаду.
Таттыки минэвэ аристэн Ольга Морозова. «Умунуптиҥас муттыки?» Атяв горово дялдара, тардат: «Бодостиҥомкун».
Итывалим, ганасим билетылва.

«Юкталила-кана исвар, тадук бирали Усть-Нюкжала ҥэнэвдиҥатын.» «Юктали» — со гудяй гэрбин. «Юктали-юктали» — икэнденэ сурум поездту Бакалдынла.

Тындаду бакалдым урунчудюнэ Ольганюн, Натальянюн- лючамны, савдери фотограф. 

Со кэтэ эвэнкил тэвэтятын поездла Иенградук. Нялипкатченэ таким саврилвэ асалвэ, куҥакарвэ.

Юкталиду мутвэ алатчечатын. Бакалдырап. Со гугда, со огды машинала тэвэвканэ, бирала исивканэ. Со гудяй бира Нюкжа,со огды бира Нюкжа. Моторкат дяврасирэп. Баргидала нян машинат истэп бикитла – интернатла. Эду бималадиҥавун илан тырганивэ. Со ая, дучама интернатту. Стенаду локучадерэ куҥакар оневуртын. Оювсек! Тадук мутвэ аритятын дюлави Галина Сергеевна тадук Владимир Андреевич Николаевил.

Оювсек алатчечатын этыркал Ольгакунвэ-кана, маталвэ-да.

Эмаксо эвенки итывати, наксэти бивки, алатченэ гиркилвэ, маталвэ. Со огды, аямама столва нарэ. Оронни улдо уловча, улдола – уман! Уманвэ городук атяв дяпта, амтара. Ала, со ала!

Эматанылва дяптылэлвэ дяптэв. Улгучаматтэв. Эми гунэ Ольга Николаевна со савдери Усть-Нюкжаду асикун. Кэтэ бэел алагувчатын Амурскай Университетту. Упкат сарэ, аявдэ эр Ольгакунва алагувнивэ. Галина Сергеевна-да со бэркэ, атыркан бинэ алагувдятян эр университетту, нюҥун дяр анҥанити этэтян. Упкат илэл сарэ нуҥанва. Со горое авалдячан музейду. 

Ардат-да Галина Сергеевна мутва ҥэнэвден Усть-Нюкжа музейлан. Эматаныл эвэды идэгэлвэ, тэткэлвэ, таксэлвэ, лочакилвэ, эматаныл дивилвэ. Би уруным ичэксэ тарвачин музейва. Онерилва куҥакарнилвэ ичем. Нян уруным.
Усть-Нюкжаду индярэ эвенкил эвенкимаснер: эвэдыт туратчерэ, орочил, тэвачил. Оювсек, соҥомок!

Ге тыргани тыманидукин мутвэ машинат ҥэнэвчатын Бакалдын бикитла. Таду со кэтэ бэел палаткалвэ иливтятын. Урувсек! Иенгра, Уркима, Бомнак…

«Аят бакалдыгат» — дукувтя огдыт.

Упкат урунчудерэ, итывадерэ, товокорвэ иладерэ: дяптылэлви иридави.

«Чичипканла» упкат илэл ирэ, тэсивувда, аямама улгурва-кутуя гара.

Тадук торжественнэй открытие Бакалдынва оран. Со огды ноёсал, савдери бэел туранви гара. Би-да улгурва бум мевандукви:

«Мондукакун! Мондудям упкатвэ эвенкилвэ, маталвэ бакалдытялвэ эр со ая дундэду Усть-нюкжа гэрбити. Дюрдяр анҥани оран он эри Бакалдын бакалдывкандерэн эматанылвэ илэлвэ горол, давал дундалдук. Тар со ая! Тувидат индевин Бакалдын – гиркилэн. Авгарая, кутуя, аякунвэ гэладим сунду, индерилду эр со гудяй Дундаду, тадук упкатту илэлду бакалдывтялду Усть-Нюкжаду! 
Аят бидекалду!»

Упкат тылдэ. Урунывкарэ.

Флагвэ Бакалдыннивэ увиски нарэ сагдавул Галина Андреевна Абрамова, Галина Сергеевна Николаева, амурскай эвенкил бэгин Вероника Игоревна Драй. Тадук эматаныл концертылва ичевканэ илэл эматаныл бикиттук.

Би-да улгучатым манниви дукувурви: 

«Кукты», «Аяври дярин», нымнгаканвэ отрывоква «Дулин Буга Торгандуниндук», давлам икэнми «Омакта анҥани». Урунывканэ – тылдерэ. Тылдэре минэвэ! Инямудянэ – матамэтчем, гиркундям. Кэргэн Андреевыл арирэ минэвэ. Амтылтын дян умукон утоти битятын. Упкат индярэ. Эр Бакалдынла эматаныл дундалдук эмэрэ, урунчудюрэ ман мандукви, бакалдыкса. Со огды кэргэн! Чайтырэп, улдотырэп, улгучаматтэв.

Ая, няма минду оран. Анҥуктарэ минэвэ: идук эмэтяв? Иду балдытяв? Городук дукултяв? Би улгучам, дукувурви таҥим, давлавунми давлам.

Иенградук кэтэ бэел, куҥакар эмэрэ. Окин-вал битяв Иенграду, урунтяв ичексэк кэтэ орорво, оротилвэ эвенкилвэ. Дукутяв «Иенгра бикит». Денмалидянэ таким ҥивалвэ: Алена Колесова, Надежда Герасимова…

Уркимаду нян битяв «Бултамни тырганиду». Эду бакалдырэв Валентина Флегонтовнанюн. Урунчуденэ, кумнуматнэ дюватчавун анывурди. Нян аритян палаткала: чайтывканэн, улирэн. Со ая аси. Тали мутва дюдуви бивкатян.
Эматаныл конкурсил, гокчанкитил. Эдиҥас упкатвэ ичеттэ. Выставкал одярилвэ илэлвэ ичем. Со бэркэл. Унтал, тэткэл, кумаласэл гудяйкакар…

Дюр тырганивэ эматаныл дивилвэ, эматаныл илэлвэ ичеттяв. Руководителил со бэркэл. Он-ка бакалдывканми, исивканми, улими тарбанди кэтэвэ илэлвэ? Жанна Николаева – руководитель ансамбля «Гудяй Дуннэ» аямама ичэлэн битян, куҥакарвэ аявдери. Интернатту Альберт Мальчакитов мутту сот бэлэетян, со бэркэ. Аят давладери, икэндери бэе. 

Манын дукудявки давларви. Со ая давланын.

Алена Колесова Иенградук – со гудяй асаткан, эвенкимни аят давладетян давлавурви. Аят дукувки, савки эведы туранми.

Усть-Нюкжаду упкат бэел эвэдытчарэ. Ҥэнеденэ долдыҥнанды эведы туранвэ.

Ман маннюн туратчерэ эвэдыт.

Оювсек, аек, гудяек. Эмугдэдув няматмар оран. Мевандув накчедиҥам эр эведы дундаканвэ. Индевин, баяндевин Усть-нюкжа. Эласа-да бакалдыдяктын бэел эматаныл дундалдук!

Омҥом дукудави. Столовайду эвенкимнил со аят, алат улидятятын.
Со аял, бэркэл асил. Гэладим нуҥардутын аяканвэ, кутуканвэ, авгарая.

Валентина Волкова