Ассоциациян КМНС Якутиякэн нантомгавын ыттъыёлягты ваңэё ңирэқав чывиптыгээңэтэты

Қликкин ыннэнқав Эйгысқываратярак гатвален омакатгыргын Координационныйкэн совета АКМНС РС (Я).

Члентэ Советкэн вэтгаво гэлгылин ваңэё тайкыё ыннэнқав чывиптыгииңиткин чама план мероприятият ңирэқэвэты чывиптыгээңэтэты.

Вячеслав Шадрин, вице — президент АКМНС РС (Я) гивлин, иңқун 2023 гээңэтгыпы ратомгаты торэтап съездакэн этническакэн ассоциаций, ынқаната мынльуулгыркын эрмэт рээн тайкыёлқыл рытомгавъё резолюцият съездакэнат. Члентэ Советкэнат гавэтгавленат титэ нэрэтэйкыңын республиканскийкэн Ассоциациякэн съезд, съезд ратваа декабрык 2023 гииңитык.

Любовь Христофорова, ыннэнқав вице — президент АКМНС РС (Я) гапыңылтэлен, ръэнут ратваа ңирэқав чывиптыгииңитык. Қликкин қонъачыңқэв — қликкин мынгыткэн ыннэнқэвэты июлык Байкалык ратваа Тунгусскакэн конгресс, ңэнри рэквэтгъэ майңыделегация республикайпы. Якутиян ратваа организаторо опты тъэр деловойкэн ынкъам культурныйкэн мероприятияк, чама — ым ңэвысқэтин конкурсак «Аякчана», тораачекык — ым «Бэркэ бэе», ратваа презентация книгакэн доктора филологическакэн наук Александранэн Варламовынэн қорэмтэльэн этногенезе, екутыльыоравэтльат рэвинрэнңыт энантаароңатык .Ымваратык ылёк қонъачыңқав августак Ассоциация гатворческама лаборатория рээн «Сирэктэ», ыргынан нинэнумэкэвқинэт Эйгысқыкин ваңэңавтэ, чама Яравараттомгыльатгыргын нэрэюнрыңынэт ваңэңавтэ всероссийскакэн выставкагты «Эйгысқыкин Сокровищагты, ынқэн мероприятиян ратваа эйңэйъйилгык Москвак. Ынқэната нантомгавын рыкалыровыргын ваңэңавэн «Сирэктэ — нить, йылгэтыльын века» национальныек художественныек музеек.

Оленекский районык августак нэрэтэйкыңын форум нутэнут яанво авыннымытвальэн оравэтльэн чинитнотак, иңқун рэмкыт қэйгипэ нынымытваркынат пэнинэваратнотак. Эйңэйъйилгык ратваа ковлекы вальын ыттол майңатгырго СМИ варатйилык ямга авыннымытвальэн. Яравычьыйилгык мургин делегация раваңэңыт инэныйгулевыльысъездак Санкт-Петербургак. Ымы планык чеэкэкин заседание Координационныйкэн Совета АКМНС Якутиякэн гафедеральный агентство по делам национальностякэн ынкъам Ассоциациякэн КМНС чама ДВ РФ реализацияно прав эйгысқыавыннымытвальэн реализацияно норм федеральныйкэн закона учёткэн КМНС, кэлингу национальность гынниңңыттыбилетык ынкъам қутти.

Михаил Кривошапкин, председательан Тороравэтльэн советкэн иквъи  нытэнмавморэ Vlll Суглунэты ңэнъянвэты, рамгогъа ңыроқав августак ыннанмытлыңтагнэты Нерюнграк. Ңотэнъылёгты ңэйылгъэн ңирэқ қликкин мынгыткэн ңыроқ парол заявкат омакатгыргэты, мынгыткэн ңэръамытлыңэн районгыпы республикайпы ынкъам ыннанмытлыңэн регионгыпы Россияйпы (Хабаровскакэн, Приморскакэн край, Мурманскакэн, Магаданскакэн, Амурскакэн область ынкъам Санкт — Петербург). Қликкин ңырақав июлык нынпаавқэн эймитык заявкат ынкъам раваңэңңоңыт гаучастникыт рээн логистикык. Ңэнъянвын Сугланма рамгогъа майңыэтнографическакэн экспедиция рытомгавъёлқыл ыннэнқавкэн реестр ванвыкэн культурныйкэн наследиякэн авыннымытвальэн Эйгысқывараткэнат Якутиякэн — ынқэн варатэн тайңо лыңъёт ванвыт, миңкы ромкавытваркыт пэнээльыт ынкъам қутти. Программак ратваңыт семинартэ всероссийскакэнайпы Ассоциацияйпы, тематическакэн площадкат предпринимательэн, чинитйилыкин, культуракэн, межрегиональныйкэн томгыльатгыргын. Ынкэмил рагаляа расширенныйкэн омакатгыргын ңиныльин совет, миңкы нэрэюнрыңын инэнлельын председатель.

Ольга Охлопкова, инэнлельын отделкэн КМНС Яравараттомгыльаткэн гапыңылтэлен программа, миңкэмил рагаляа ымвараткэн ылёңэт авыннымытвальэн қонъачыңқав августак авынгородык республикак. Праздник рамгогъа площадык Орджоникидзе 11. 30 тылекин — ямга Якутиякэн варатэн парад  «Мури кынмал — Россия!». Қынур — ым пэнинэмил энантаароңат, эргэты вальын церемония праздникэн «Кочевье — 2022», Виилыгтыкин выставкан «Эйгысқыкин ңэвльулқыл», выставкан нэнэнин рисункат «Гымыгваратэн праздник», праздникакэн концерт «Мури — Эйгысқыкин оравэтльаморэ».

Ңотэнгииңитык общественнокэн организациян «Эйгысқықэй» нантомгавын конкурс коврикыт Эйгысқывараткэн «Мытлыңқликкин коврикыт мытлыңқликкин гээңэтэты ЯАССР».  Ваңэңавтэ нымытвальыт эйгысқырайонык Якутияк наранкалыровңынат чиниткинэт ваңэёт, рыкалыроквыргын конкурсак очно — заочныйкэн. Чама — ым рамкэты ынкъам рамкыльэты наранкалыровңын Якутскак ңыроқав Республиканскакэн фестиваль — конкурс Якутиякэн ңэандыръин, Эйгысқыкин авынвараткэнаргэн «Эйгысқыңэв». Рэплыткуа праздник 
конкурсата Эйгысқытипъэйңэтэ, гролмыпоторагыргата «Томгыльатпоторагыргын».

Чама Ассоциация раваңэа гаминистерствота экологии, нотагаймычьыкэн ынкъам утчыкукин хозяйства РС (Я) тайкыёлқыл (наложения) ООПТ нотаеквэ миңкы нынымытвақэнат авыннымытвальыт Эйгысқывараттэ, миңкы ытри ныгынниңңыттықинэт. Ынкэмил Ассоциацията энқу лыгнин проект законкэн, рытэнмавъё Министерствота майңатгыргын Эйгысқыкин ынкъам ваңэёта Эйгысқывараткэн РС(Я),  никвъэн энқу этнологическакэн экспертизат проведенияк промышленныйкэн компанията геологоразведочныек ваңэёк.

Ирина КУРИЛОВА

Гэйилыльэтлин Равтыңана