«Эйгысқыкин Йыңэттэт» Чувчеңнэнэнэтэ қырым ынынтыяатын авыннымытвальэн вагыргын

«Эйгысқыкин Йыңэттэт» Чувчеңнэнэнэтэ қырым ынынтыяатын авыннымытвальэн вагыргын

Ассоциацияльыт лыгъоравэтльэн нымнымык Колымскак Нижнеколымскакэн районык нантомгавын тамэнңатгыргын иңқун ыныныйгулевын кэлиткульэ тэйкык чувчеңтайңыквыт.

 

Гэтэйкылин проект «Эйгысқыкин Йыңэттэт» (Радужная Арктика) гэвинрэтлин Проектным Офисом Развития Арктики (ПОРА). Гапыңылтэленат газетак «Илкэн» инэнлельын проектакэн чама председатель Ассоциациякэн лыгъоравэтльэн Якутиякэн Жанна Дьячкова.

 

«Колымскак средней национальной Общеобразовательныйкэн калеткорак нинэныйгулевқин чувчеңйилиил чама литература. Инэныйгулевыльу нитқин Вера Гавриловна Дьячкова, «Заслуженный учитель Республики Саха (Якутия)». Вера Гавриловна инэнлельын кружка «Эйңэв» (Зов), миңкы нэнэнэт ныйгулетқинэт типъэйңэк чувчеңйиле чама путурэк. Майңыңинқэгти, ңээккэқэгти ныйгулетқинэт тэйкык тайңыквыт: ңэвысқэтти нываңэқэнат кылылетэ, нынниқин қэплыт, ңинқэгти — ым ниргуқинэт қорарынныт тайкынво тайңыквыт».

 

 

Ныпыңылтэлқэн Жанна Дьячкова (чувчеңнынны Ечгэвыт). Ымыльо тайкынво  тайңыквыт: кылылет, тесьма, титит, вэңыткунэңэт, бормашинаң ымы қутти яаёлқылтэ, инэнлельэ проектакэн гэймитлин Якутскак ынкъам гэнңивылин Колымскагты. Проект гаваңэлен ңирэқ йилгын гиулетыльыт гэйгулетлинэт сувениртайкык. Гивлин Ассоциациякэн инэнлельын лыгъоравэтльэн, иңқун ымыльо тайкыё нэрэйъылңын участникырык Чувчеңтороравэтльакэн форумык, ынқэн мероприятия ратваа Колымскак, ңутку нынымытвақэнат Якутиякэнат чувчеңыт, эйңэйъйилгык ңотэнгииңитык. Форумэты рээнңыт эрмэт респуликакэн правительствайпы, чама — ым рэмкыльыт Лыгъоравэтльанотайпы ЧАО.

 

«Чувчеңтороравэтльакэн форум нэрэтэйкыңын грантальа Министерствота по внешним связям ынкъам вараткэн делам Республики Саха (Якутия). Сметык тайкыма ңотэн мероприятия кэлитьул уйңэ тайкынво сувениртэ. Тайкыё сувениртэ нытэңқин кэтъотконаң етыльырыкы рэмкыльырык, ынкъам винрэтыльырыкы форумык мероприятияк «.

 

Ынкэмил проект пэнин ваңэльын, нивқин Жанна Дьячкова: «Гиулетыльыт гиулетыплыткук калеткорак гэчевкы нываңэқэнат пэтле нытомгатқэн тайкыё чинитмынга. Ынкъам — ым ыныйгуленңин ыттъыёлягты нэрэныйгулевңынэт чиниткинэт нэнэнэт. Рымавтэты ямга мероприятияк рэмкыльырыкы етыльыт Колымскагты — амқынъычо ратваңыт кэтъотконаңат сувениртэ«.

 

 

Павел Дьячков гивлин: «Гымнинэт нэнэнэт нэмықай ныйгулетқинэт, коргаквыргын гиулетыльыт ваңэк қорарынна, рисоватык рынныткынык, кылылеваңэльыт. Мачынан ынңин вальын гэчевваңэё рымавтэты рылек мурыгнэнэнэк, мурыгнутэк«.

 

 

Пётр Котельников, эрым Халарчинскакэн наслегык: «Ынқэн гатвален гэчевкы вальын ваңэё. Колё мысвыну, иңқун ңотэн мероприятияк Эйгысқыкин нэнэнэт нытэминңыльэтқинэт.«

 

Ирина Курилова, 

Гэйилыльэтлин Равтыңана

Написать комментарий

один × два =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ