Торъоравэтльэн проектат вэтгаво гэлгылин нымнымык Колымскак
Ивыр нымнымык Колымскак Нижнеколымскакэн районык нываңэқэн ыннэнқав Эйгысқыкин — Ныкъээкин ымвараткэн торъоравэтльэн форум «Омакатгыргын». Торъоравэтльарыкы районкэнагты винрэтыльу ырыкы нитқинэт Лыгъоравэтльанотайпы автономныйкэн округыпы, Аллаихакэн ынкъам Среднеколымскакэн районтэ. Ынқэн ыттъыёлкэн майңыторъоравэтльакэн омакатгыргын, ынаняноткэн гатвален городык Нерюнгри Торъоравэтльэн Суглан.
Мытынкэтъоңатыркын, торпредседательо организациякэн ңъэлгъи Александр Громов нымытвальын нымнымык Сасыр Момскакэн районгыпы. Ымы ытлён гээтлин Форумэты. Ынаныттъыёлкэн чемгъогыргын мероприятиякэн рытомгавыргын Эйгысқыкин — Ныкъээкин совет торъоравэтльэн.
Нинэнлеқин мероприятие ынкъам нинэвинрэтқинэт ваңэльыт форумык, председатель Ассоциациякэн чувчеңин Якутиякэн Жанна Дьячкова.
Ыннэнқав эйңэйъйилгык, ынаныттъыёлкэн ылёк лыги гэтчылинэт етыльыт форумэты тумгыт, гэгичивэтлинэт образовательныйкэн проектак.
Ңирэқав ылёңэтык гаваңэленат ңиныльыт проектныек деятельностяк. Қликкин мынгыткэн мытлыңэн парол етыльыт форумэты, гаманаңатленат ңырақ командагты ынкъам нантомгаквъан чиниткинэт проектат, таңмалявынго қаагынрэтыльыт, атъылкэвагыргын (здоровый образ жизни), рытомгавынго қрачетмероприятият, гэулятгырго чама увичватгырго ымвараткэн қръачетгыргыт.
Экспертат активгыпы Ассоциацияйпы КМНС Якутиякэн напалёмтэлгъан выступленият режимык ВКС. Ымы видеосвязык ганкалыровленат проектат участникыргэн рытомгавъё республикык рымагтэпы.
Қаақын ңирэқ ылёңэт раваңэңыт ңиноравэтльат Форумык. Программак концерт чама қръачетгыргын. Ымы ратваа ковлёкы вальын ыттол, миңкы рэльуулгыңыт Правительства РС (Я), Лыгъоравэтльанотайпы автономныйкэн округыпы, Государственныйкэн Собрания (Ил Тумэн) РС(Я) вэтгаво нэрэлгыңын : «Актуальныйкэн пынлёт торъоравэтльэн политики авыннымытвальэн Эйгысқывараткэн», ынкы наранкалыровңынат чиниткинэт ваңэёт, проектат рытомгавъё ңыранплощадкак юнрыёт темат.
Форум гэвинрэтлин грантата МинАрктиката.
Андрей Исаков
Фото Жанна Дьячкова
Гэйилыльэтлин Равтыңана
