«Дьэлиҥдэ» таба иитэр хаһаайыстыбаҕа вертолет көтүүтэ толорулунна 07.09.2022 10:37

«Сардаҥа» хаһыат редакцията бу дьыл балаҕан ыйын 2 күнүгэр Дьэлиҥдэ таба иитэр хаһаайыстыба табаһыттарыгар оройуон дьаһалтатын сакааһынан былааннаах вертолет көтүүтэ тэриллэн ыытыллыбытынан сибээстээн Дьэлиҥдэ национальнай нэһилиэгин олохтоох бэйэни салайыныы дьаһалтатын тыа хаһаайыстыбатын боппуруостарыгар исписэлииһэ Мария Эдуардовна Семенованы булан таба иитэр биригээдэлэргэ вертолетунан көтүү хайдах тэриллэн ыытыллыбытын билиһиннэрэргэ көрдөспүккэ бэрт судургутук ылынан санаа атастаста.

— Мария Эдуардовна, үбүлээһин ситэтэ суоҕунан «Дьэлиҥдэ» таба иитэр хаһаайыстыба үс производственнай биригээдэлэригэр вертолет көтүүтүн биир эргиир көтүүнэн толорорго сорук туруоруллубутун хайдах тэринэн быһаардыгыт?

— «Дьэлиҥдэ» авиаплощадкатыттан табаҕа вакцинация ыытар икки ветисписэлииһи, биир үлэһити уонна табаһыттар сакаастаабыт таһаҕастарын ылан баран вертолет 1 №-дээх таба иитэр биригээдэҕэ (биригэдьиир Карпов Я.Н.) «Тимир учаастагар түһэн оскуола оҕолорун ылан салгыы Уудьа үрэххэ олохтоох 5 №-дээх таба иитэр биригээдэҕэ түһэн икки ветисписэлииһи хаалларда уонна оскуола оҕолорун ылан баран заправкаҕа Сааскылаахха көтө сырытта. Салгыы вертолет былааннаммытын курдук Улахан Эбэ уҥуор Доҕойго олохтоох 4-с №-дээх таба иитэр биригээдэҕэ (биригэдьиир Павлов И.А.) түһэн сэлиэнньэҕэ киирэр оскуола оҕолорун ылан баран Дьэлиҥдэҕэ кэллэ.

— «Дьэлиҥдэ» таба иитэр хаһаайыстыба үс ыстаадаларын табаларыгар күһүҥҥү вакцинацияны ыытыыны хайдах былааннаан тэрийэргэ соруктанаҕытый?

— Хаһаайыстыба салалтата Өлөөннөөҕү ветуправлениены кытта былаанынан 5 №-дээх таба иитэр биригээдэҕэ тахсыбыт ветисписэлиистэр Дмитриев Виталий Михайлович, Иванов Семен Семенович 1 уонна 5 №-дээх таба иитэр биригээдэлэр табаларыгар вакцинацияны миэстэтигэр тэрийэн ыытыахтаахтар. Доҕойго олохтоох 4 №-дээх ыстаада табаларыгар вакцинацияны миэстэтигэр табаһыт ветсанитардар тэрийэн ыыталларыгар анал ветеринарнай эмтэри тиэртилэр.

— Кэлиҥҥи сылларга сайыҥҥы оҕо сынньалаҥын бириэмэтигэр үөрэнээччилэри таба иитэр биригээдэлэргэ таһааран сынньаныы тэриллэн ыытыллар буолла. Ону эһиги хайдах сыаналыыгыт?

—Бу дьыллааҕы сайыҥҥы бириэмэҕэ «Дьэлиҥдэ» таба иитэр хаһаайыстыба биригээдэлэригэр уопсайа 13 оҕо сынньанан киидилэр, ол иһигэр 4 оскуола оҕото үлэлээх уонна дьарыктаах буолуу киининэн үлэлээтилэр. Бу биллэн турар оскуола оҕолоро кыра саастарыттан биһиги төрүт хаһаайыстыбабытын билэллэригэр улахан төһүү күүс буолуохтаах.

Бу түгэнинэн туһанан «Дьэлиҥдэ» таба иитэр хаһаайыстыба табаһыттарын ааттарыттан үөрэх оройуоннааҕы салаатын (Иванова М.Х.) үлэһиттэригэр таба иитиитигэр оҕолору сынньатыыны тэрийэн ыыталларын иһин махталбытын аныыбыт уонна кэлэр сылларга үөрэнээччилэри таба иитиитигэр сынньатыыга үлэлэрин салгыы ыытыахтара диэн эрэнэ хаалабыт.

Еще больше интересных новостей в телеграм-канале Ulusmedia

Николай Стручков

«Сардана (Заря)»
Подробнее: https://xn--80aaaaaqemr0d4akx.xn--p1ai/article/70211