«Омакатгыргык» ганкалыровлен тамэнңы — класс тамэнңыльатгыргэпы

«Омакатгыргык» ганкалыровлен тамэнңы — класс тамэнңыльатгыргэпы

Ымвараткэн Эйгысқыныкъээкин форумык «Омакатгыргын» ганкалыровлен тэминңы — класс ваңэрак,  энанватгыргын, энолятгыргын чама эвиръытынэгыргын. Гапыңылтэлен инэнлельын ваңэракэн амройыръыкэн община «Торвагыргын» Альбина Третьякова.

 

 

Етыльырыкы форумэты нэльуэн ваңэльыт ваңэрак, энанватыльыт нэлгыт, панрат, ваңэңавтэ энолятыльыт чама тынэма эвиръыт плекыт, лилит, къэлит. Колё нэңъэлқин ваңэгыргын ваңэрак, ымыльо тайкыёлқыл чинитмынга: рытэнмавъёлқыл, энанвыёлқыл, рыетъавъёлқыл нэлгыт льэленъярано.

 

Эмқынваңэңавыльа нанкалыроквъан тамэнңы — класс Вера Дьячкова, инэныйгулевыльын чувчеңйиле калеткорак, рыкалыровнэн чама пыңылтэлгъэ, миңкри роллыёлқыл, тынэёлқыл къэли.

 

 

Ваңэльын ваңэрак общинакэн «Торвагыргын» Светлана Никулина рыкалыровнэн миңкри ныноллықэнат чама нынниқинэт панралилит.

 

Гэчевкы гатвален, лыги рытчык энолятгыргын панралекэн, ңотэн лилитэ кавэты кынъуткук чаата, ымы тынэё колё нычимықин.

 

Ымы гэчевкы гэнъэлинэт  тайкыма рытта рытрииръын, тамэнңатгыргын рыкалыровнэн Дина Третьякова. Нивқин қорарытрээръа нываңэйгым эмқунэче. Равтыңана — ым рыкалыровнэн чама йылнинэт къэликин тэнмычьыт, иңқун чинит ыныннинэт къэлит.

 

 

Қлявыля нэмықай ганкалыровлен тэминңы — класс : энанватыльыт ваңэльыт общинак «Торвагыргын» Владимир Ходьяло чама Егор Тарасов, миңкри нытэйкықин явылгын ынкъам левтисгын қорэн рыкалыровнэн Иванына Слепцовына ынкъам энанвэнаквыргын қаакэн гапыңылтэлен калеткоракэн инэныйгулевыльын қаагынрэтгыргыкэн Павел Дьячков.

 

 

Энанватгыргын ымыльорыкы пэгчиңу гэлгылин, қутти энмэс энанватыңогъат Владимирына Ходьяло нэнанкалыровқэн тааңыткольырыкы энанватык нэлгыт.

 

 

Римма Тарасова нэмықай ваңэльын ваңэрак рыкалыровнэн нэлгыкин нэматгыргын.

 

 

Ынкэмил Альбина Третьяковына рыкалыровнэн торваңэран, ңэнри пэтле раялгынңыт ваңэльыт, ынкы ратваа янра вальын пэнъёлгын ромавыльын торваңэран.

Ымыльо ваңэльа нъатчақэн титэ раялгынңыт торваңэрагты.

 

 

Ивыр амқынъычо нивмури авнантыяатка тэлеңкин вагыргын. Танңыэвиръэ қырым омың нытваан лыгиэвъэръэпы,  танңыплекыт қырым омың нытваан лыгиплекгыпы, лыгипамдяйпы.

 

Кымъу мынылгыркынэт лыгиэвиръыт, вэймэну мынылгыркынэт ваңэңавтэ ваңэльыт. Мачынан эргыпатыльо нынъэлыркынэт.

 

Галина ВЫРДЫЛИНА
(Виилыгтын ынин)
«Колымская правда»

Гэйилыльэтлин Равтыңана

Написать комментарий

три × 5 =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ