Тормультсериал «Умка» гаймаңэн нэрэгитэңын киноткольа қликкин ыннэнқав гытгайъэлгык
Гапыңылтэлен порталтык RG.RU, ыттъыёлкэн серият торанимационныйкэн сериал «Умка» киностудияйпы «Союзмультфильм» нэрэгитэңын подмисчикырга онлайн — кинотеатрык Оkko қликкин ыннэнқав гытгайъэлгык, неделя галяк — қликкин амңыроотқав гытгайъэлгык — мультфильм наранкалыровңын эфирык телеканалык «Карусель». Креативныйкэнат продюсертэ проектакэн — Татьяна Киселева чама Наталья Тихомирова, художник-энантомгавыльын — Анна Попова.
Онлайн — кинотеатр Оkko ңъэлгъи сопродюсерго чама финансовым тумгу (партнёром) «Умқин».
Тормультфильм, ныпыңылтэлқэнат рытомгавыльыт, нынкалыровқэн тэлеңкин вагыргын эйгысқываратрэмкин, ынкъам гытамо нылгықин чиниткин нутэкин. Гэчевкы нэрэгитэңын мықынананарыкы нынкэтъоңатқэн ыттъыёлкэн сериал Владимира Попова чама Владимира Пекаря — «Умка» (1969 гииңиткин) ынкъам «Умқана нинэлқырирқин тумгытум» (1970 гииңиткин). 2019 гииңитык гэнъэтлин ңирэққликкин мынгыткэн парол гииңит титэ ганкалыровлен фильм «Союзмультфильмак» гантомгавлен плыткоё трилогию нынныльын «Умқы ёлкак».
Чивмыметражный мультфильм гичиву гэлгылин гитэльырыкы — мынгыткэн миллион оравэтльата гэгитэлин эргыпатыльын фильм онлайн — платформак.
2021 гииңитык «Союзмультфильм» ваңэңңоат проектак, лыги эмрылгыңэ вагыргын, фольклор, тэпъайңагыргын Эйгысқывараткэн.
Консультантано гитлинэт — президент Ассоциациякэн авыннымытвальэн Лыгъоравэтльанотакэн Анна Откэ, чама — ым инэнлельын лыгъоравэтльакэн ансамблькэн «Кочевник» Умка Кайпанау.
Кинок тормультсериалык Умқан тумгытум, ңинқэй Тайкэ мэйңэтгъи, ңъэлгъи қэйгипэ эңэңыльу. Вакъотвама чувчанрак ныпыңылтэлқэн нананарыкы гэчевкы вальыт пыңылтэ, нэнэнэну вама миңкри ытлён гэтумгыльэтлин гаумқама ымы қутти эйгысқыгыннит рээн.
Эмқынсерияк ымыльо томгырыкы ныторымгоқэн торприключеният, лыги нытчықин Эйгысқыкин вагыргын.
Алвальытвальын «Умқэн» художественныйкэн вагыргын : ваңэгруппальа гаймаңэн нэльуэн отгычечавэты вальын визуальныйкэн решеният, ымы миңкы элюкыльин эйгысқыкинэт амалваң пэральыт ылёңэттэ, ныкиритти, ыльыл, гииңиткин чывиптыт. Проектак гэнумэкэвлинэт ымыльо эйгысқыгынникыт : қэйумқэқэй ынкъам ынин ыммақай, рэпинтықэтгъэ эйгысқыины Ильма, мэмыл Кора, эқычалгын Пычиқ, кувчемгъоқэпэр Маха ымы қутти.
Ныпыңылтэлқэн креативныйкэн эрым «Союзмульфильмакэн» Мария Савиных, тэңвытку гэтэйкылин алва вальыт айңанаңаткогыргын яраркэн, флейта, ванныярар, оркестркэн чама вараткэн рыкалыровкэн искусство.
Лыгъоравэтльэн айңанаңаткогыргын гэнръэлевлин ынңоткэн танңыайңанаңаткогыргык рээн.
«Гэчевкы тыпалёмтэлгъан эйгысқывараткэн айңанаңаткогыргын чама государственныйкэн лыгъоравэтльа — айванальэн ансамбль «Эргырон «, — пыңылтэлгъэ айңанаңтомгавыльын проектакэн Никита Ямов. — Ынкэмил тыгитэан нымкықин документальныйкэн чувчеңвараткэн кинот, гиулетэ яраркэн пэвчаткогыргын — қутти яраровэсватгыргын равалёмңыткы мультсериалык «.
Игыр ваңэгруппа нываңэқэн ыннэн сезонкэн мультсериалык, нарантомгавңын қликкин ыннанмытлыңэн серият.
Юлиана Слащева, председательан Советкэн директоров киностудиякэн «Союзмультфильм «:
«Нытэңқин томгыльатгыргын ңинқэйин ытри қэйумқықэйин, тэленъеп пыңылтэльё таңычьыгыргын гитэк тайкыё отечественныйкэн анимацият. Ганкалыровлен ытльэн ылгыгыргын нананагты, нэнэнин тэгъеңгыргын ымыльо рытчык лыги гролмакы, тэңипэкин томгыльатгыргын. Ынқэн ымыльо гитэтэ, моргынан мытынчимгъувын рытылевык ыттъыёлягты мультвселенной-торсериалтэ».
Юлия Осетинская, генеральный продюсер проетакэн:
» Мыкычьу нымытвальыт мурык нутэк гытамо нылгықин чиниткин тэлеңкин вагыргын, фольклор, ымы Лыгъоравэтльанотак нэмықай. Мурык мультсериалык мытранкалыровңыркын нананарыкы вагыргын Эйгысқывараткэн: иңқун ымы ытри қынур ынкы вальыт (эффект погружения) пыңылтэлма пыңыл.
Ытръэч ипэкин:
1. Вэтгав «Умка» чувчеңъйиле «Умқы»
2. Кинокэн энантомгавыльын «Умка» 1969 гииңитык алва гэтэйкылин кинок, нымытвальыт оравэтльат чумык, чувчеңыт нынымытвақэнат чувчанрак. Аткэвма тайкыё яраңы гэльулин консультантальа проектакэн — инэнлельэ лыгъоравэтльакэн ансамблькэн «Кочевник» Умка Кайпанау. Ңотқэн ңирэқ ярат алва вальыт, алва вараткэнат, торсериалык ганкалыровлен чувчанран.
3. Ыттъыёлкэн мультсериалык гатвален аңқапчеқалгын тупик. Ынқо алва нэтчыан, титэ лыги гэтчылин тэлеңкин лымңыл эқычалгын (розовая чайка) кынтэпчеқалгын, — ынңин проектак пинтықэтгъи йъаяқ Пычиқ. Бизон — ым нэлпууръыэн қэюутэ Ёка — гынник пэнин вальын лыгъоравэтльак рээн.
Гэйилыльэтлин Равтыңана
Фото: Союзмультфильм
