Үрүҥ Хайа табаһыттарыгар саҥа Буран снегоходтары биэрдилэр

Долганнар түөлбэлиригэр Үрүҥ Хайаҕа таба иитиитинэн дьарыктанар “Үлэ Геройа Илья Спиридонов аатынан муниципальнай унитарнай тэрилтэҕэ” улуус дьаһалтата үбүлээһининэн уонна “Анаабыр Алмаастара” АХ көмөтүнэн муора суолунан 10 Буран снегоход кэлбитэ.

Бу күннэргэ кэлбит снегоходтары табаһыттарга үөрүүлээх быһыыга-майгыга туттарыы тэрээһинэ буолан ааста. Снегоходтары туттарыы тэрээһиҥҥэ улуус баһылыга Эдуард Платонов, Үрүҥ Хайа нэһилиэгин баһылыга Егор Спиридонов, “Үлэ Геройа Илья Спиридонов аатынан МУП” директора Роман Туприн уонна табаһыттар кыттыыны ыллылар.

Роман Туприн “Үлэ Геройа Илья Спиридоноваатынан МУП” директора:

“Үлэ Геройа Илья Спиридонов аатынан МУП” 8 таба иитиитинэн дьарыктанар ыстаадалаах. Тэрилтэҕэ билиҥҥи туругунан 14654 тыһыынча таба баар.
Маны 46 табаһыт көрөн-харайан бостууктуур. Табаһыттарга 31 чуум үлэһитэ ас астаан, таҥас тигэн күүс-көмө буолан үлэлии сылдьаллар. Быйыл саҥа талыллыбыт улуус баһылыга Эдуард Платонов эбии үбүлээһини тыыран биһиги тэрилтэбитигэр 10 снегоход “Бураны” ылан биэрдэ. Снегоходтары “Анаабыр Алмаастара” АХ муора суолунан тэрилтэ генеральнай директора Павел Маринычев көмөтүнэн тиэллэн кэлбиттэрэ. 8 “Бураны” ыстаада биригэдьиирдэригэр туттардым. Кинилэр бэйэлэрэ көрөн “Бураннары” үчүгэй үлэлээх табаһыттарга түҥэтиэхтэрэ. 2 “Бураны” тэрилтэ мехинизаторыгар уонна зоотехнигар хааллардым.

Итини таһынан улуус дьаһалтатыттан табаҕа комбикорм ыларбытыгар 1 мөлүйүөнү, бензин хаһаанарбытыгар 1,5 мөлүйүөнү, оттук маһынан хааччыллыыбытыгар 1 мөлүйүөн харчынан көмө оҥоһулунна. Түгэни туһанан хаһыат нөҥүө улуус баһылыгар Эдуард Петрович Платоновка, улуус баһылыгын бастакы солбуйааччытыгар Иосиф Владимирович Васильевка уонна “Анаабыр Алмаастара” АХ генеральнай директорыгар Павел Алексеевич Маринычевка барҕа махталбын тиэрдэбин.»

Еще больше новостей в телеграм-канале Ulusmedia

Евгений Константинов
Подробнее: https://xn--80aaaaae5flrcuak4i.xn--p1ai/article/76752