Дёр токив марив (Добыл двух лосей)

Смешные и невероятные рассказы Анатолия Степанова — Ламутского

(Однажды я охотился на уток. После трех дней охоты решил вернутся домой. Сел в лодку, но мотор не смог завести и решил плыть на веслах. По пути увидел, как по реке плывут коряги. Присмотревшись заметил, что это не коряги, а два лося переплывают реку. А в ружье у меня остался один патрон. Я приготовил ружье, взял топор, из лодочной веревки сделал петлю и смело направил лодку на лосей. Приблизившись накинул петлю на рогах обеих лосей, лоси потащили лодку к берегу. Когда лоси коснулись земли я тут же выстрелом убил одного из них. Другой что есть силы потащил лодку и мертвого друга по берегу. Когда у лося закончились силы он упал, а вскочил ему на спину, оседлал его и что есть силы начал его бить топором по голове и убил. Так я вернулся домой с богатой добычей).

Өмнэкэн холаки хɵрриди, эгден тɵӈэрлэ некичиддив. Илан инэӈу биддиди нямакли некичэм бакрив. Аллан буюсэк очалан хоч энтэкэе хокнив нян дюткий мучудай мэргэттив. Деплэӈу-да абылчирин, нюру-да манудин.

Некичэрбу, оилби, абдулби инэӈу чуптурэ окаттаки дюгуттив. Энтэкэе хеттиди окат хɵлилэн анӈаттив. Хисэчин дептиди, хэтчэ бими таракам-та хуклэснив. Нян мямсив толкандарив. Дюлай исча бисив. Ирэм. Як дёр бэилни тэгэттэ?! Улгимирэм: «Ху ӈиел бисэс?» Ноӈартан барагра: «Хин буюсчэ токилни бису». Эмэрэч кɵеттэм, эливун эстэн бэил бис, ями дёр токил мостала дэсчир. Атикандукий улгимирэм: «Эрэк ӈи эмун?» «Хи-ка тек эмунри, – гɵнни».

Мялриди мяӈчилрам: «Як мямси толканни?»

Бадикар нёлтэн гарпун, ай инэӈ очалин ɵрэлдэрэм. Дептиди бакчалби, оилби, абдулби момила нэриди хɵлидук андаснам.

Мотору тулкудэй маӈчирам. Илан инэӈу ач гургэлэ илатча мотор тулкудэй нуруттэн.

Мотору хаюпчалин набуӈчилрив-да аллан буюсикэлкэн бисэку мэргэндулэв ай-такан бисин, теми дюткий уливунди-да мучуруку ядин-си.

Ирэв-тарав мэргэтникэн, гякитам эрэли нодывникан, икэникэн энтукун эендидэнрив. Нюру ачча бисивэн хами-гу некичэр асукат момив долан эстэн доватта. Эсэми дёр кабял ɵйдэлив кусикэтникэн дэгэлритэн, чивкачан моми дюлдэлэн тэгриди икэддин.

Тачин эвэчич эендиддив.

Өмними дюлдэлэв якавут-та нэлгэнни эенивэн иттэм. Дюллэ эчу-да авдатта. Нэлкэнилэ окатли хоя нэлгэр эессɵттэ. Тадук эмэрэч кɵеттэм – ями-ка дёр токил окату давудда. Би укал токилбу мача урэчин хокнам, ӈалу-да хилгэлрэн.

Пэктэрэми наӈтисниди нюруму ачча бисивэн дёнам. Хеплэй, момилай или-тали гэлэттэм. Абдуй додукун ɵмэн нюру бакрам.

Өмэн нюрич дёр токилбу этэнди мар. Миндук хɵнтэ бэй эррочэндук тикулимчэ, би-ка эсэм таррочин бэй бис. Эннэв тачиннюн толкатта. Долбу эрэк несу хэвкэнни мэдукэтчэ.

Нюру пэктэрэндулэй хинрам, тобару наӈтиснам, моми усидукун мавуту орам.

Тачин киматтиди токилтики энтукун нюрмаснам.

Токил далилатан иссиди дёривутэн таӈнядукитун мавутларам. Усив момилай онерэм. Тадук токил тɵрлэ иссивутан алаттам.

Токил бɵдэлдюр тɵру мэддиди як биси эӈидюр хɵлэтки тибавкан. Асукат момидук эчу тикрэ. Пэктэрэми ɵгэрриди ɵмэн токив гэдэмэклэн пэктэрэнэм. Токи тарбадит кɵкэрин. Гя, пэктэрэвун игдукун олусниди, момив кɵкэчэ токиннюн ирникан далила биси хɵпкэчэнтэки тибаснан. Момив укал тɵрли хируӈчин. Токи эӈин манучалан няӈулакаттан. Таракам тобару гадыди токи аркалан мэлуӈчирэм. Токи хоч энтэкэе олалдариди эмэпчэ эӈиди чаламран.

Эливун токи эӈи бичэ. Би хоя орам таткаттив. Гякитан орал биситэн, тадук токи урэчин эӈи орам ок-та эчу иттэ.

Аран-аран токи аркамдулан тэгэттэм. Тикрэку токи мину хэкчин. Теми би-дэ ӈэлрэм.

Тачин мут есчимэттит. Токи эӈин манчалан тикрин. Би токидук эвдэриди, тобарач ноӈман омкатлан ечилрив. Токи адиракан-да илисчирин, туркурин, кɵкэеттин.

Бэргы токил биситэн. Бакчаи хигриди, улрэв момила нэриди эеснэм. Момив ургэке один, гору дюлай исидэнрив.

Исчалав атикаӈу энтэкэе хокнин, ок-та эчи аяврий аяврин. Бу дюганив чуптурэ деплэлкэр одит. Тачин ɵмнэкэн би буюсилкэн бисив.

Эсэм ɵлэкчир. Эми тэдер атикандукив улгимили.