Некичэн (Утка) (проза эвенская)

Смешные и невероятные рассказы Анатолия Степанова-Ламутского

(Утка самец нашел хорошее местечко для того чтобы утка самка могла отложить яйца. Он мечтает о счастливой жизни. Зовет свою подругу. Но появляется другая пара уток. Он вылетает на защиту места. Вдруг он видит двуногое существо, который поднимает на него огненную палку. Раздается грохот. Ему больно, он умирает. Зовет свою подругу, которая улетает от него. В конце утка прощается с землей).

Аике эрэк тɵр. Эрэли эйдун тывун. Далила кɵчукэн тɵӈэр, хɵлилин дыӈтэ орат, ирэт-тэ хоя. Ӈэлэм одакан тала дыкнэдип, ӈи-дэ этэн бакра. Эррочин кɵчукэн мɵлэ некичэр бисивутэн этэр дёмкатта. Тɵӈэр бардан аӈаптан, тардадук нёлтэн хɵкилкидин. Эли-ка хиги. Элэ гянюми хупкум одиру. Гяву умталбадин, тадук ок хутэлти балдаривутан-такан алачиддиру.

Эрэли хоя дебын. Дюганиду куличар, дылкэкэр, хумтачал исудир, хɵлиндулэ тэвтэл хедир. Эливун ай тɵр.

Тек хупкив иладаку. Дюллэ мэни аисандаку. Хэлэми еласиндаку, будии тэстэку, дэтлэи айдаку. Тек-э.

Гяву, атикан, эртэки кэвуӈчили.

Тат-татай! Хɵнтэ некичэр эмэддэ. Мут тɵрэӈур тедэй мэргэттэ-гу? Этэм бɵр, мэн хупкий дысутчим! Эррочин ай, хоя деплэлкэн тɵру ӈиду-дэ этэм бɵр. Ӈив-дэ этэм элэ ивкэн. Атикан, дэгэлгэр, мэр тɵрэӈур дысутнигэр, хопчаӈа некичэрду ӈи эӈи бисивэн ичукэгэр.

Эрэк як? Эрэк ӈи? Идук эрэк дёр бɵдэлэлкэн хен? Яв ноӈан нэмкун дэтлэндулэй дявуттан? Тарич мину нюнэттэн. Ай, харам, тарак тогалкан мо. Тек тогу тиндин, мину мадин. Эди, эди, би эсэм кɵкэмсэ. Ой, энеке! Як энсэн ноӈан тоган. Ями мявму хаӈтамран? Би кɵкэдилрэм?!

Атикан! Гяву! Нёлтэӈу! Авуски хɵрэнри? Эди мину эмэкир!

Як хилусан, эрэк бини муданни урэчин. Дюлэскилэ этэм ок-та эрэк гудей тɵру иттэ, нод буглай этэм ок-та бивэттэ. Хурэлби этэм бэбэддэ. Мину этэн ӈэрин гуденэ. Иӈэн минду елтэпки бидин. Дюлэскилэ мину хакарин, хатарси, химӈэн алаттан.

Аич били, аяври, чулбаня, гудей бугу!