Нынкалыровқэн тормультфильм Умқы, Анадырык кинотеатрык «Полярный» окружнойкэн столицак «Умқы кинок»
Қээқын рымавтэты гэтэйкылин фильм қэйумқэқэй гаытльама чама ынин тумгытум — ңинқэйқэй, янор гасниматлен ңирэқ қликкин мынгыткэн гииңит галяплыткок. Рытомгавго торкино гэвинрэтлинэт чама вагъат экспертано Эйгысқываратрэмкыт Лыгъоравэтльанотайпы, ыргынан нэнрыгйивэтын съёмочныйкэн группан, ныпыңылтэлқэн ИА «Чукотка» ссылкагты пресс-службагты АКМНЧ.
Виилыгтын: Союзмультфильм Проект фильмакэн Союзмультфильм моогъэ нантомгавыңогъан 2021 гииңитык. Ваңэльа лыги нэтчыан вагыргын, фольклор, айңанаңаткогыргын Эйгысқывараткэн.
«Қымэк ыннанмытлыңэн йъилгын вэтгаво гэлгылин, иңқун қэйгипэ рыкалыровык вагыргын лыгъоравэтльанотакэн, моргынан мытъйылгъэн кэликэл Владилена Кавры «Род Умқэн». Коллективык торъоравэтльат — нывэймэнқинэт, кувчемгольыт ылгу лыңъёт чиниткин ваңэё. Ваңэма ыргынан пэгчиңу нылгықин умқин вагыргын, рэқу гэлгэ лыгъоравэтльата, айванальа умқы, миңкри нынымытвақэнат оравэтльат гагыннэма ыннэн нутэк, миңкри вальыт эңэңыльыт, миңкри навэръыяақэнат ытри, пэнин Эйгысқык нытвақэн йыңэттэт этықон эмқунэче», — гапыңылтэлен президент АКМНЧ Анна Отке.
Гэвинрэтлин творческой группагты — методист этноязыковойкэн гэулятгыргын Лыгъоравэтльакэн институткэн развитиякэн гэулятгыргын чама повышениякэн квалификации Лариса Выквырагтыргыргына, инэныйгулевыльын Институткэн Эйгысқывараткэн РГПУ им. Герцена Зоя Туре ынкъам инэнлельын чувчеңкэн ансамблякэн «Кочевник» Евгений (Умка) Кайпанау.
«Ваңэльыт проектак Союзмультфильмакэн гэетлинэт этнопаркагты «Кочевник «. Гамңылёленат миңкри нынымытвақэнат чувчанрак, миңкри вальыт гынникыт. Гымнан тынкалыровын чувчанран,, ыргынан — ым гарисоватлен чум, қырымэнат чувчеңин орвыт — ненцальэн, ымы эвиръыт қырымэнат мургинэт. Натайкыңогъан миңкри вальылқыл қэйгипэ «- пыңылтэлгъэ Евгений Кайпанау.
Рычемгъовъё ыттъыёлягты эңэңыльын Тайкэ, советский мультфильмайпы ңинқэй, ынин тумгытум қэйумқықэй, энмэс мэйңэтыльыт. Чиниткин ярак ныпылтэлқэн нананарыкы ынин майңатгыргын, томгыльатгыргын қэйумқэқэй, игыңэв Ильмой, нықитықин мэмыл Корой, ынкъам эқычалгын Пычиқ рээн. Ымыльэты лентан ңирэқ қликкин мынгыткэн ңыроқ минутат. Телеэфирэты чама онлайн кинотеатрэты мультфильм гэтэйкылин қликкин ыннанмытлыңэн ныппылюқинэт эпизодтэ.
Чечаквыргын: «Умқы» (0+) — советскакэн рисоватъё мультфильм 1969 гииңиткин, рытомгавъё режиссёра Владимиром Пекарем ынкъам Владимиром Поповым студияк «Союзмультфильм». Автор сценариякэн — кэличитыльын Юрий Яковлев. Мультфильм чама ынин рымагтэты тайкыёлқыл «Умқэтэ нинэлқырирқин тумгытум» (0+), тайкыё ыттъыёл, тэңычьу гэлгылин оравэтльата иңқун ынкы Умқы, ынин ытльа, айңанаңаткогыргыр Евгения Крылатова чама грэп гаяален Аиды Ведищевой. 2019 гииңитык гэтэйкылин фильм «Умқы ёлкак» (0+), юбилееты ынаныттъыёлкэн мультфильмагты. Перепечаткакэн пыңыл сайтак prochukotku.ru ссылка ынаняноткэн.
Гэйилыльэтлин Равтыңана
