Анаабыр улууһугар Табаны иитии сылын биллэрдилэр

Анаабыр улууһугар кэлбит 2023 сыл – Табаны иитии, оттон Сааскылаах нэһилиэгэр Аҕа сылынан биллэрилиннилэр. Маны сэргэ оччолорго күүстээх үлэтинэн-хамнаһынан биллибит «Севернай» совхоз тэриллибитэ 40, Дьоруой табаһыт Илья Константинович Спиридонов төрөөбүтэ 110 сылларын бэлиэтиэхтэрэ.

Бу күннэргэ анал хамыыһыйа бастакы мунньаҕын ыытта. Улуус баһылыгын социальнай боппуруостарга солбуйааччыта Наталья Спиридонова киирбит этиилэртэн бастакы былааннаныллыбыт тэрээһин торумун билиһиннэрдэ:

— Таба иитиитин сылын бэлиэтииргэ 13 киһиттэн турар хамыыһыйа тэриннибит. Бастатан туран, сыллары бэлиэтиир логотиптары оҥоруохпут, табаһыттар доруобуйаларын быраастар көрүөхтэрэ, рентгеҥҥэ түһэриэхтэрэ, тиистэрин оҥоруохтара, сайыҥҥы кэмҥэ, сыл устата сайаапка ылан, санаторийдарга сынньата-эмтэтэ ыытыахпыт, сайынын “күөх рейс” диэн таба ыстаадаларыгар вертолетунан сибиэһэй ас таһаартарыахпыт, кулун тутарга Дьэлиҥдэҕэ уопут атастаһа диэн И.К.Спиридонов аатынан МУТ уонна «Арктика” табаһыттара кэнсиэртээх, спортка күрэхтэһиилээх семинар оҥоруохпут. Таба төрүүр кэмигэр агитбиригээдэ тэрийэн киинэ устуулаах, кэнсиэртээх ыстаадаларга тиийиэхтэрэ. Урут уһуллубут “Хранители тундры” диэн документальнай киинэни киэҥ араҥаҕа, оскуолаларга көрдөрүөхпүт.

«Севернай» совхозка төрүттэммитэ 40 сылыгар аналлаах кинигэ бэлэмнииллэр. Муус устар ортотугар слет бырааһынньыгын анал киэҥ бырагыраамалаах былаанныахпыт. Үөрэх салалтата оскуолаларга удьуор табаһыттар, чуум үлэһиттэр, булчуттар тустарынан кэпсиир тэрээһиннэри ыытыахтара. Мантан да атын тэрээһиннэр, идиэйэлэр киирэн иһиэхтэрэ. Арассыыйаҕа педагог уонна аҕа сүбэһит, СР Үлэ сылын итиэннэ улууспутугар бэлиэтэнэр сыллары олунньу 18 күнүгэр культура управлениетын, үөрэх салалтатын, тыа хаһаайыстыбатын управлениетын кытта былаанныыбыт.

Гуннара Байгильдина
Анаабыр уоттара (Огни Анабара)

Подробнее: https://xn--80aaaaae5flrcuak4i.xn--p1ai/article/88426