Эйгысқыколледжак Черскиек натылёпгъан Гииңит инэныйгулевыльин чама наставникан

Эйгысқыколледжак Черскиек натылёпгъан Гииңит инэныйгулевыльин чама наставникан

Рыйгэватгырга Президентана Владимир Владимировичына Путинына — 2023 гииңит инэныйгулевыльин чама наставникан, ынкэмил мынгытқликкин гээңэтэты оратъылёйпы рытомгавъё российскакэн педагогики Константина Дмитриевича Ушинского. Миссияльо гииңиткин — ымыльорык лыги ынылгыркын статус инэныйгулевыльин ваңэё, эквың рытчык профессиян инэныйгулевыльин.

 

В КЦ «Возрождение» гатвален церемониян тылёпгыргын Гииңиткин инэныйгулевыльин чама наставникан мурык Эйгысқываратколледжак.

 

Елена Егоровна Антипина эрым Эйгысқываратколледжакэн гивлин «Президентана Российскакэн Федерациякэн гэнанымңылявлен ңотэн гииңит инэныйгулевыльин чама наставникан. Педагог, рыйилыльэтык греческайпы » инэнлельын нэнэнэргин » ынқэн тэңгипэ ваңэё инэныйгулевыльин, наставник — ым — ынқэн инэныйгулевыльырыкы йылылқыл чиниткин гыёлгыргын, лыги лыңгыргын, ылгыргын чинитваңэёгты, нананарыкы, торваңэльырыкы етыльыт калеткорагты, колледжагты, ВУЗ. 

 

 

Мачынан эвыр тъэр гииңит нъыгалян, тэңэвын нэнакъэтоморэ ылгу лыңъёт инэныйгулевыльыт, ямга торъоравэтльэн инэныйгулевыльу гитлин кувчемгъольын, чичевыльын наставник. Ылгу лыңъётэ чиниткин ваңэёт инэныйгулевыльырыкы нытомгатқэнат торъоравэтльат ваңэльыт инэныйгулевыльыколлективак».

 

Эмблемано Гииңиткин инэныйгулевыльин чама наставникан нэлгыгъан пеликан, рыкалыровъё символ педагогическакэн ваңэё, инэныйгулевыльэ, преподаватель а, воспитательа нинэныйгулевқинэт нэнэнэт Вагыргэты нынтэнмавқэн, мэчынкы чинит вальылқыл. Ынқэната моргынан ванэ мынынтыяатыркынат мургинэт инэныйгулевыльыт, ымы ыргынан мури қырым ынынтыяанмык. Гарылгылен стихотворениян Раиса Герасимовна Марусева пеликан рытомгавъё Эдуардана Асадована. Студентарык нэмықэй нарылгыан стихотвореният инэныйгулевыльык.

 

Ынаныттъыёл умэкэтынвык гэюнрылинэт педагогическакэн дуэттэ ынкъам трио — наставник — наставляемый. Булдакова Анастасия Михайловна, Марусева Раиса Герасимовна, Уваров Анатолий Дмитриевич, Христенко Христина Ивановна, Рычкова Любовь Анатольевна, Кривошапкина Ирина Иннокентьевна, Антипина Елена Егоровна — наставникыт, ыргинэт эргыпатгыргын, гыттапгыргын, гыёлгыргын ныйилқинэт ваңэтомгырыкы, студентарыкы. Нанкалыровын тылёпгыргык Гииңит инэныйгулевыльин чама наставникан нэнвэниткувын вэниқэе, қынур калеткорак торымгон калеткогыргэты.

 

2023 гииңитык рақръаченңыт мэңин таңың вальын наставнико, ынқо рачваа конкурс «Признание». Ынкы рэвинрэнңыт торваңэльыт инэныйгулевыльыт — наставляемый, ыргынан нэмықэй наранкалыровңын торпроектат: мастер — класстэ, научно — практическакэн конференцият, конкурсат педагогическакэн тамэнңыгыргыт, фестивалтэ, мынгыткэн ңырақ парол творческакэн чама просветительнакэн торпроектат.

 

Плыткоңңок гэпутурэлинэт вальс инэныйгулевыльэ: Анатолий Дмитриевич Уваров, Зинаида Григорьевна Кэмлиль ынкъам студентат: Тигран Хачатрян, Анастасия Поккель.

 

Ыттъыёлягты инэныйгулевыльырыкы чама наставникырыкы рачваа нымкықин конкурсат, мынқитпыңгъан инэныйгулевыльыт «Ни пуха, ни пера!».

 

Яна ДАНИЛЬЧЕНКО
Колымская правда

Гэйилыльэтлин Равтыңана

Написать комментарий

16 + 6 =

  • һ
  • ө
  • ҕ
  • ү
  • ҥ
  • ӫ
  • w
  • ӧ
  • ӄ
  • ԓ
  • ӈ
  • ʼ