Ңырақ қликкин мынгыткэн мытлыңқав гииңит Дмитрию Васильевичу Кривошапкину-Нимкалану тэминңыльын қорэмтэльын поэт ынкъам йилыльэтыльын

ИЛКЭН. Ытлён гъурэтлин ыннанмытлыңқав яравычьык 1929 гииңитык қаагынрэтыльырык– қорэмтэройръык Василия ынкъам Ульяны Кривошапкинык. Ытлыгын пэтле уйнэ нъэлгъи, титэ нэнэнэт ныппылюқинэт гатваленат. Ынпыэкык Дмитриян нъэлгъи мынгыткэн гииңит, ытлён нъэлгъи винрэтыльу ытльагты, рымайңавынго ытльэнъют чама чакэттыт.

Дмитрий еп ңэнъылянма лыги рытчынин ейвэлкин вагыргын, ытлён ымытитэ ванэ ныпынычваркын коргэты левлевэ нынымычвақэн. Ынин гаймычьывэтгав, гаймаңэн нинантомгавқэн лявляввэтгав ытльэн йилык.

Ынаныттъыёлкэн стих ынан кэлинин плыткоңок ңирэқ қликкин мынгыткэн парол гииңитык. Нынныльын «Уямкан» ңэйкин кытэпалгын. Ңотқэн стихык ынан кэлинин таңпэрагыргын ынкъам армагыргын этынвыкин Верхоянскакэнат ңэйти, томгатгъэ грэп Марияна Гоголевына (Колесовына турңэвысқэту). Яанэн грэп районнык фестивалык, ынқо республикак, нъэлгъи лауреат. Грэпык вэтгавыт авынгыёлчеткэн поэта ынкъам тэңпилгыльын яаё грэпык ыттъыёлягты урэльын вагыргын. Нымкыче грэпыльыт нъэлгъэт лауреатыльыт, яаёлқылтэ конкурсак районык, республикак, всероссийскакэн уровняк чама элвэнотак.

Нымкықин гэкэлилин произведеният Дмитрий Васильевич ченэтнотагты, Себяну, ынин таңпэранотагты. Торъоравэтльат эвыттагнэты нынтомгавқэнат ынин стихгыпы грэпыт. Йъарат ылгу стихыт поэта авынгыёлчеткэн мелодист Алквиад Степанов.

Ңотқэн грэпыт ылгу лыңъёт ныяақэнат республикак конкурсак, гаймаңэн равалёмңыткы интернетык. Кытур республикак конкурсак «Уврэл эллықыкин ынкъам утчыкукин» грэпыльын нымнымгыпы Тополиный нъэлгъи лауреат, яанэн грэп «Гиаван» Алквиада Степановына вэтгавыт Дмитриян Кривошапкинын.

Эргыпатгыргын Дмитрия Васильевича Кривошапкинын-Нимкалана коргаво нъэлгъи қорэмтэваратэты йэльыльатгыргын қорэмтэйэлеты екутъыльыэпоса «Ньургун Ботуур Стремительный» эргыпатыльын Платона Алексеевича Ойунского. Ынқэн рыкалыровыркынэн ынин авынгыёлчеткэн, рыкалыровнэн ымваратрыкы гаймычьын чиниткин йилиил ынкъам гыёлгыргын қорэмтэльэн чама екутыльыйиле. Ынкэмил ынан гэйилыльэтлин поэма П.Ойунского «Нычелықэн эңэңыльын», стихыт екутыльыпоэта Семёна Даниловын чама қутти авторын.

Чимгъук авынгыёлчеткэн поэта-йильыльэткин рапэлятгъа қонпы оравэтльачимгъук. Вама ытлён, гэнъэтлин член Союза кэличитыльыт РС(Я), ныннэтык нынны заслуженныйкэн ваңэльын культуракэн РС(Я), лауреат республикакэн премии нынныльын Василия Дмитриевича Лебедевын, почётныйкэн оравэтльан Кобяйскакэн района чама ветерана тыла ВОВ. Таңъоравэтльан!

Қаақын ыннэн страница ынин вагыргыкэн патриота чиниткин нутэкин. Ытлён ынаныттъыёлкэн шофёр-инэнлельын, ынан эръэткэ машинаңата етгъи нымнымэты Себян-Кюель 1958 гииңитык. Ынңин вальын вагыргын ңотэн гииңиткин, гымнан антыяатка ытръэч-ым ынқэн пыңыл ынан титэ мынвэтгавмык.

Мургин варат вэймэну нинэлгықин эргыпатыльын мургин нутэтумгын лиңчыку қонпы рапэлятгъа, ынаныттъыёлкэн поэт, йилыльэтыльын, тумгытум, ынээльын.

Зоя Степанова

Гэйилыльэтлин Рагтыңана