Алёчелгын Кындыкан пэлқынтэчгъи космосгыпы оратнотагты
ИЛКЭН. Федеральныйкэн форумык «Цифровой алмаз» Якутияк выткукин ынқэн – алёчелгын Кындыкан, символ Эйгысқынанаргэн, гатваленат космосык, пэлқынтэчгъи оратнотагты. Ынқаната рэқулымңэ «Роскосмос» пыллеңэты вальын Россиякэн, риңэмъетыльын-космонавт Олег Артемьев, ынан рыльэтэнин орбитагты ынкъам рыпэлқынтэвнин оратнотагты.
Олег Артемьев, ытлён таңтумгытум республикакэн, ынан йылнин алёчелгын Алинана Довыдовына, мыкыче чемпионка пэрэё гран-при ымвараткэн чама всероссийскакэн фестивалыт поторагыргыкэн, путурэльын хореографическакэн группак «Кындыкан». Ынқэн нэнэнэкин тагъяңгыргын ынкъам организаторльат, тэгъеңю иңқун ыргин алёчелгын нъытван ымвараткэн космическакэн станцияк (МКС).
Рыльэтэтык алёчелгын МКСэты ныгтықэн задача, ымыльэты инэң ныгитэқин алгыараткэты, иквъи Олег Артемьев. Ытлён гивлин, алёчелгынэн рэңагыргын орбитагты нымкықин оравэтльак катгоң рытчыёлқыл – сотрудника института инэнэнмэлев-биологическакэн проблем, ыргынан нэгитээн, эвнэамчеръаатка рэңатылягыргык, тинэңэңыльыт иничгытэтгъэт, рэқу ытлён нынңивықин ңэнри.
Алёчелгын Кындыкан тыңэвыё гатвален дублерша, гэнңивылин космосэты. Скафандрак космонавтат, риңэльыт ынык рээн нэкэлиэн автографыт.
«Тыңэвыё алёчелгын Кындыкан орбитагты – ынқэн қырымэн пыңыл, ынқэн символ, ыттъыёлягты чемгъогыргын қэглынангэт нынъэлқин. Ынқэн рыкэтъоңатгыргын иңқун космос – қырымэн ыяакэнат планетат чама галактикат, ымы льолгыгыргын амалваң вальыт культурат чама традицият», – нивқин томгатъё проект, эрым творческакэн объединения «Кындыкан» Илаан Кындыкан.
Ынык вэтгава, ыннэн алёчелгын нытвақэн Чьэчең полюсык резиденцияк Чысхаана Оймяконык. Ваны ңирэқэв алёчелгынэн ивыр нычимгъуқинэт, миңкы гынрыру лыңык.
Винрэтыльын торжественной церемонияк председатель советкэн ынпыоравэтльат АКМНС РС(Я) Татьяна Сивцева гэпытқыивлин: «Алёчелгын Кындыкан – қырымэн уусвинэң, ынқэн символ армагыргын увириткин ынкъам майңыэмчимгъуу лыңъёт Эйгысқыкин авыннымытвальэн».
Ирина Курилова
Гэйилыльэтлин Рагтыңана
Фото: ТО «Кындыкан, И. Курилова
