«Илкэн» – морыкы қликкин мытлыңқав гииңит. Гэтэйкылин қырымэн тъэркин, тайкынго қаақын мыкың…» Қырылгыркынитки яравычьыкэн газетак «Илкэн»

Таңъылёңэт, энарылгатыльыт, тумгытури, нутэтумгытури.

Нэтэйкыэн яравычьыкэн номер республиканскакэн газета «Илкэн» ГАУ РС(Я) «Сахапечать».

Мытынкэтъоңатыркын, ныннык изданияк қаарамкэн вэтгав «знак», «затесь» вэтчатвальын уттык. Ынаныттъыёлкэн номер республиканскакэн уровняк нэтэйкыэн газета гытгайъэлгык 1999 гииңитык, морыкы энмэс қликкин мытлыңқав гииңит.

Галяльын паңъэвңытоъылёк Якутскак гамголен традиционныйкэн фестиваль «Льэлен нымгоқэн Якутияк». Мероприятияк гатваленат ымвараткэн конкурс тинтинкин чама ыльылкин скульптура «Бриллианты Якутиякэн». Ынкы гаваңэленат, қырымэн ытръэч екутыльытэминңыльыт, ыргин тумгыт элвэльинайпы регионгыпы страны, ынкэмил Монголияйпы чама Китайгыпы.

Участникыт ынкъам рэмкыльыт праздникык коргаво льук қаат общинайпы «Энеси Халан» нынныльын Аполлон Ильинова, инэнлельын Раиса Ильина Жиганскакэн районгыпы. Виилыгтыт рэльуңыткы торгазетак «Илкэн».

Ыттъыёлкэн неделяк столицак регионык раваңэңоңыт съездак қорэмтэльыт РФ, миңкы рэльуулңыңыт қорэмтэльэн родтэ мынгыткэн ңирэқ парол эйгысқықин районгыпы Якутиякэнат, қаақын Лыгъоравэтльанотайпы, Камчаткальыт, Магаданльат, Хабаровскальыт. Ынқэн авнантыяаткыльэн майңызначимое омакатгыргын.

Ынқо қорэмтэльыт Республикакэнат Саха румэкэнңыт майңысугланэты, вэтгаво нэрэлгыңынэт отчет чама ыттъыёлягты плантэ, комакатъыён председателя чама правления Союза қорэмтэльэн Якутияк (стр. 2-3).

Нымкықинэт пыңылтэ танңыйиле йиле КМНС страницак 2-5.
Ынңытэқ гатвален қликкин мынгыткэн гииңит этнографическакэн мезеек нынныльын Семена Курилова нымнымык Андрюшкак Нижнеколымскакэн районык, историян торымгольын ынкъам ңотэнъылётагнэты кэличитыльын лыги ымыльорыкы роман «Ханидо ынкъам Халерха», ныпыңылтэлқэн эрым хранилищакэн Алиса Чернякова.

Полиметаллическакэн холдинг «Селигдар» кэлинин соглашениян ыттъыёлягты томгыльатгыргыкэн Беллетскийкэн национальныйкэн қаарамкэн наслег Алданскакэн район, ратваа инъэту нымытвальырыкы оравэтльагты (стр.5).

Ръэнут ынқэн «Вэниқэй» Маргаритан Вырдылинан, инэнлельын нэнэнэкин коллектива нымнымык Андрюшкак Нижнеколымскак районык, инэныйгулевыльын фольклорык чама путурэльык айңанакалеткорак? Кырылгыыткы нымэйыңқин чама ныгичивқин интервью Иринан Куриловын (стр. 8-9).

Мургин газетан ынкъам портал нэнанпыңылтанморэ миңкри нынымычвақэнат қаагынрэтыльыт ынкъам ылвылю таймылырскакэн популяциян. Ынқэн ымыльо, нымычвальыт рэмкыт қыгитэгыткы стр.11

Галяльын високосный гииңит, гатвален трагичным литературакэн, духовности ынкъам культуран нымытвальыт этносыт…

Уйңэ нэлгъэт ымыльорык лыги вальыт оравэтльат, қаарамкыңав Людмила Алексеева – Геван (НВК «Саха»), Николай Калитин, қаарамкэн кэличитыльын рытомгавъё Ассоциациян КМНС Якутиякэн, Варвара Данилова, қаарамкыңав, кэличитыльын, ынаныттъыёлкэн редактор «Илкэн», Анатолий Платон – Ламутский, кэличитыльын, лидер қорэмтэльэн регионык. Гаврил Курилов – Улуро Адо, эргыльын экык орвыльэн вараткэн, ученый, кэличитыльын, философ, публицист, ынинэт ваңэёт лыги нылгықинэт ымварат.

Материал қликкин мытлыңқав гииңит «Илкэн» ынкъам Варвара Даниловын морыкы тыңивынин доктор филологическальын наук Юлияна Хазанкович СФВУ н. М.К.Аммосовын «Торгынан антыяатка… торгынан ымыльо, антыяатка вальын…» (стр. 12-13)

«Ынан ылгу нинэлгықин ягтачгыргын» ынңин вальын вэтгава нэгичиэн стихыт мургин тумгин Анатолия Степанова-Ламутского (стр.14-15)

Қонпы антыяатка…

Қывыписыватгыткы чама қырылгыркынитки «Илкэн». Подписка сайтак подписки Почта Россиякэн ямга почтовом отделение, гаймаңэн Ярак печати мурык редакцияк.

Инкэмил қылыркытик морыкы ынкъам қыкэличитыркынитык пыңылти мургин порталык.

Валентин ХОТУ

Гэйилыльэтлин Рагтыңана