НЫТУРҚИН ПОРТАЛ «ИЛКЭН». НЫЛЕМУРИ ЭЙГЫСҚЭТЫ
Қонъачыңқав августак (гытгайъэлгык) 2020 гииңитык Ымвараткэн ылёк гаваңэңолен мультийилыкин интернет — портал «Илкэн» ванвык http: //ilken.ru. Ынанъяноткэн тайкыёлқылқыл — рыркывавкы сферан ыттъыёлягты пропаганда йилыкин, культура, традиционныйкэн пэнинвагыргэты Эйгысқывараттэ Якутиякэнат. Пыңылкэн ресурсак ратваңыт мытлыңэн йилыт чама ңирэқ йилыт государственныйкэнат (танңыйилиил ынкъам екутъыйилиил), чама английский.
Мынынкэтъоңатгъан, гавэтгынлялен Генеральной Ассамблеяк ООН, 2022 гээңэтгыпы 2032 гээңэттагнэты ратваа мынгытгээңэт ымвараткэн Эйгысқываратъйилыкин.
Нынтомгавқэн чама нынымкэвқин портал ваңэльа газетак «Илкэн» ынкъам актива Ассоциации КМНС РС(Я) пэнинванвык.
Порталык ратваңыт пыңылтэ, государственныйкэн йилык, чама — ым Эйгысқываратъйилык КМНС Якутиякэнат, репортажтэ, статъят, очеркат, виилыгтыт, видеосюжеттэ ръэнут алва нынъэлқин Эйгысқынымытвальэн чама — ым миңкэмил нывинрэтқинэн эрмэт майңатгыргэты, таңвагыргэты.
Ынкэмил моргынан мытивыркынитык торыкы творчество рэмкин КМНС амалваң вальык жанрак, эргыпатыльыт кэличитэнантомгавыльыт ынкъам торлитераторат.
Ивыр ымваратык, ымы мурык майңынутэк, вэймэну нылгықин Эйгысқымайңатгыргын, ынкэмил — ым ратаңнымытваңыт вараттэ. Нымычвынаңморэ, иңқун мурык порталык рэмкэнңыт энарылгатыльыт.
Моргынан колё вэймэну мытылгыркынэт Эйгысқывараттэ, мачынан вагыргын таңың нынъэлгъэн, қынңивыркыниткы чиниткинэт материалтэ, комментарият вэнратынго мургин портал «Илкэн».
Валентин ХОТУ, газета «Илкэн»