Кындыкан куклата космостан төрүт һиригэр кэллэ

ИЛКЭН. Якутияга «Цифровой алмаз» федеральнай форум иһинэн бэлиэ күн буолла – космоска таксыбыт Кындыкан куклата, Арктика онуга Север оголорун символа, төрүт һиригэр кэллэ. Бу һитиһии буолла Роскомос көмөтүнэн онуга летчик – космонавт Олег Артьемьев, Россия геройун миссиятынан, гини кукланы орбитага таһаарбыта онуга төрүт һиригэр эгэлбитэ.

Олег Артемьев , республика бэрт һугас киһитэ, күүстээк һанаалаак кукланы Алина Давыдовага, үгүс төгүл чемпионкага онуга международнай , всероссийскай үҥкүү фестивалын гран- при каһаайкатыгар, “Кындыкан” хореографическай группа кыттыылаагар туттарбыта. Бу быһыы туолбута оголор онуга организатордар амбицияларынан, бэйэлэрин иннилэригэр һыал туруорбуттарынан , кукланы международнай космическай станция (МКС) ботугар киллэрэргэ.

Кукланы МСК бортугар тириэрдэр ыаракан һорук турбута, үчүгэй бэлэмнээк онуга груз һэрэктээк буолбатагын көллөрөр, диэн бэлиэтээбитэ Олег Артемьев. Гини эппитэ, кукла орбитага көтөрүгэр элбэк киһи көмөлөспүтэ – медико — биологическай проблема институтун үлэһититтэн һагалаан, гини космоска көтөрүгэр алдьанан каалбатын диэн, корабль оҥорор үлэһиттэргэ диэри тиийэ, кукланы ыытарга бэлэмнээбит киһилэр һөгөллөр этэ, туокка гинини космоска ыыталларын.

Бэлиэтээн этиэккэ һөп, Кындыкан куклатыгар дублерша баар этэ, гини эмиэ космоска көппүтэ. Скафандрдарга , космонавтар бэйэлэрин һуруктарын каалларбыттара.

«Кындыкан куклатын орбитага тиэрдии – бу мээнэ өс буолтак, бу символ, бага һанаа туолар диэн, онно итэгэйэр буоллакка гини һыалын һитэр диэн. Бу һанатар, космос – бу ыраак баар планета онуга галактика эрэ буолтак, бу һир эҥин – эҥин культууралар онуга традициялар көрсөр һирдэрэ буолар» — диэн кэпсээтэ проект онуга «Кындыкан» творческай түмсүү һалайааччыта Илаан Кындыкан.

Гини кэпсииринэн, куклалартан биирдэстэрэ Тымныы полиһыгар Чыскаан резиденциятыгар Өймөкөөҥҥө баар буолуо. Иккис кукланы канна уурулларын кэпсэтэбит.

Торжественнай церемония кыттыылаага, Һака Һирин АКМНС- тар тарейшиналарын председателя Татьяна Сивцева бэлиэтээтэ: «Кындыкан кукла – бу онньуур эрэ буолтак, бу һанаа күүһүн онуга Коту һир олоктоокторун каһан да бүппэт улакан бага һанааларын символа буолар».

Ирина Курилова

Тылбаастаата Туприна П.И.

Фото: ТО «Кындыкан, И. Курилова