Катыстыр поселагар лингвистическай экспедиция һырытта

ИЛКЭН. Буус тоҥор ыйын 31 күнүттэн, күн түһэр ыйын 3 күннэригэр Катыстыр поселогар Алдан районугар лингвистическай экспедиция СВФУ эбэҥки тылын преподавателя Надежда Прокопьена Николаева онуга студеннар Ляридо Игнатенко, Яна Данилова буолан һырыттылар. Айаннарын һыала – эбэҥки тылынан һаҥарар киһилэри булан устуу, былыргы туттар маллары, һэптэри, таҥастары каартыскага түһэрии онуга видеоматериаллары устуу буолар.

Экспедиция кыттыылактара поселок кырдьагастарын гытта көрүстүлэр: Стручков Владимир Иннокентьевиһы, Гаврилов Олег Андреевиһы гытта. Иккис күҥҥэ “Дылачат” эбээлэр обрядовай группаларын обрядын видеога уһуллулар. Гинилэр Россия сборнайын биотлонистарын аластыыр обрядын оҥордулар, ол күн спортсменнар Катыстыр поселогар кэлэ һылдьыбыттара.

Норуот маастара Надежда Михайловна Григорьева үгүһү көллөрбүтэ онуга кэпсээбитэ. Гини тикпит оҥоһуктара Һака республикатыгар бэрт биллэллэр.

Комойуок иһин, биһиги элбэк эбэҥки тылын билэр киһилэрдээкпит диэбэппит, онуга Лариса Авангардовна Енохова эбэҥкилии һаҥатынан үөрдүбүтэ. Ускуола оголоро, Степанова Ганна Международнай олимпиада кыайыылаага онуга Стручков Антон эбэҥки тылынан творческай номердары көллөрбүтэ. Комолтолоок, «Эннэкэн” народнай коллективы гытта һатаан көрсүбэтэкпит, оголор Алдан гуоракка практикага барбыттар этэ.

Һаамай өйбүтүгэр каалбыт , «БУТА” этно-стойбищатыгар һырыыбыт буолар, ыраак поселоктан тэйиччи баар. Табалар, иньэ һир, национальнай ас…Өссүө туок наада буолуой эбэҥкилэр тустарынан информацияны комуйарга. Эбэҥки табата һуок, олок һуок. Эрэнэбит, экспедиция кыттыылаактара бу һырыыларын һөбүлээбиттэрэ онуга һыалларын һиппиттэрэ буолуо диэн.

В.И.Стручкова, №20 ускуола учиитала, п.Катыстыр.

Тылбаастаата Туприна П.И.