Эбээн поэтын өйдөбүлүгэр

ИЛКЭН. “Баргачан – душа эвенской поэзии” кинигэ презентацията , талааннаак поэт, прозаик онуга учебниктар автордарын Василий Спиридонович Кейметинов — Баргачан өйдөбүлүгэр ананан, Догордоһуу дьиэтигэр күн таксар 21 күнүгэр буолбута.

Бу кинигэ Василий Спиридонович ологун, профессиональнай орогун онуга творчествотын туһунан кэпсиир. Ыалдьыттар мероприятияга һыаналаабыттара гини педагогикага кылаатын, литератуурага онуга культуурага, гини аптаак тылларын онуга һаҥа талаан күүһүн билбиттэрэ. Һугас дьонноро, доготторо онуга биир дойдулаактара гини туһунан һанааларын эппиттэрэ, самодеятельнай онуга профессиональнай артыыстар ырыаларынан бу киэһэни киэргэппиттэрэ. Бу событие эбээн норуотун талааннаак уолугар өйдөбүл эрэ буолбакка, Якутия Коту норуоттарын культууратын һыаналыыр дьоннорго пырааһынньык көрдүк буолбута.

Бу кинигэ Василий Спиридонович – Баргачан кэргэнин Александра Давыдовна Кейметинова инициативатынан бэлэмнэммитэ, гини билигин Тополинай орто ускуолатыгар эбээн онуга литератуура учииталынан үлэлиир. Финансированиятын оҥорбута , Баргачан куччугуй кыыһа Ольга Васильевна Ултургашева , Манчестерскай университет профессора.

Василий Спиридонович түөрт тылы билэр этэ: эбээннии, нууччалыы, һакалыы онуга английскайдыы, орто дьылыгар һылдьан үөрэппитэ. Гини элбэк доготтордоок аан дойду үрдүнэн, ол иһин кинигэ бу тылларынан тылбаастанан таксыбыта онуга үгүс киһи ааһыага.

Ирина Курилова

Каартыска: И.Курилова.

Туприна П.И. тылбааһа.