«Илкэн» каһыат күн таксар ыйынаагы номерын аагыҥ

Үтүө күн кылыылаак аагааччыларбыт, биир дойдулаактарбыт, доготторбут.

ГАУ РС(Я) республиканскай «Илкэн» каһыат күн таксар ыйынаагы номера тагыста.

Ый һагаланыыта заполярнай районнарга күммүт тагыста. Муора һирин норуоттара, барыкааннара бу күнү көрсөллөр, уһун караҥа күннэр ааһаллара, олок һалганарын көрдүк пырааһынньык буолар (1 стр.).

Традиция көрдүк 2-4 страницаларга төрүт олоктоок этностар тылларын туһунан информацияны таһаарабыт, биһиги порталбытыгар таксыбыттары. Һаныыбыт, интереснай буолуо диибит, ким тылы билэр онуга үөрэтиэн багарар ускуола үөрэнээччилэрэ онуга улакан дьоннор.

Ону гытта биһиги ньуучча тылынан өстөрү таһаарабыт, коту дьоннор олорор һирдэригэр наадалаагы, медицина, тыл, спорт, СВО онуга Аллараа Калыма Колымскай поселогар ситуацияны онуга этнологическай экспертизалар тустарынан (6-7 стр.).

Караҥа ыйыгар ааспыт дьыл «Илкэн» 25 дьылын бэлиэтээбитэ. Редакция историятын онуга бүгүҥҥү күннэрин, төрүт олоктоок норуоттар олокторугар редакция бэчээттээн таһаарар муҥ үлэтэ буоларын, Андрей Исаков «Как мы отметили свое 25-летие» материалын онуга «Национальнай пресса оруола икки атын каһыат примерынан»туһунан аагыҥ (5 стр.).

Онуга, автор «Илкэн.ру» портал туһунан улакан статьяны һуруйбута, түүн караҥарар ыйыгар үгүс тылынан таксар СМИ диэн регистрацияламмыт, ааспыт дьыл улакан һитиһиитэ буолар. биллэр общественница Августина Марфусалова этэринэн: «Билигин эдэр дьон интернетка бардылар. Биһиги төрүт тылбыт эмиэ онно баар буолуоктаак. Ол тылынан биһиги күннээги олокко кэпсэтэр буолуоктаакпыт, онуга өстөрү таһаарыактаакпыт.. « (13 стр.).

«Время Арктики» диэн рубрика анныгар эһиги Һака Һирин Арктика һайдыытын онуга төрүт олоктоок Коту норуоттар дьыалаларын һалайар министр заместителя Михаил Погодаев интервьютын аагыаккыт, ведомство котугу һирдэргэ социально – экономическай һайдыыны оҥорбут үлэтин туһунан («В центре внимания – Север и его жители», автор Валентин Христофоров, 8 стр.).

Күн таксар 12 күнүгэр 84 дьылын туолуоктаак этэ, талааннаак эбээн поэта, һуруйааччы, учебниктар автордара Василий Спиридонович Кейметинов – Баргачан. Бэйэтин һанаатын онуга «Баргачан – душа эвенской поэзии» кинигэ презентациятын туһунан Ирина Курилова кэпсиир («Для меня он был большим другом», «Памяти эвенского поэта», 9 стр.).

«Илкэн» көрө – кэтии һылдьар Алдан районун, эбэҥки булчутун Степан Пахомов һуйатаалаак дьыалатын туһунан, һокуоннайа һуок бултаабытын иһин. Ирина Курилова «ФАДН опровергает решение судей…» статьятын аагыҥ (10 стр.).

Бу страницага Якутия Союз общин председателин Анатолий Лебедев, буолан ааспыт общиналар съездтарын туһунан кэпсэлин. Гини федеральнай онуга региональнай уровеҥҥа көрүллүөктээк вопростары таарыйбыта.

Якутия норуоттарын догордоһууларын Дьиэтигэр торжественнай «Триумф традиций, ценностей, единения» номинация церемонията буолан ааспыта. Бунна котулар общественнай организациялара награда ылбыттара. Бу мероприятия РФ «Иньэ һири карыстааччы» онуга Һака республикатыгар «Төрүт һири карыстааччы» дьыла арыллыытыгар аналлаак этэ (11 стр.).

Һоторукаан Якутия Национальнай библиотекага икки интереснай событие буолан ааспыта. Ол көрдүк, Байкал олоктоок эбэҥки – мучердар олонколорун, һака тылыгар переводтаан таһаарбыт, олонкоһут Валентин Исаков үлэтин презентацията онуга российскай биллэр переводчик, телеведущай онуга преподаватель Дмитрий Петровы гытта көрсүһүү. («Переводчик Исаков» и «Полиглот Петров», автор Аят Сатаров, 12 стр.).

Биһиэкэ һаҥа автор баар буолла – Дмитрий Сидоренко Омскай областан. Гини агыйага һуок произведениялары һуруйбута, үгүс үлэтэ иньэ һир онуга булт туһунан, олоктоок онуга российскай печатка таксыбыта. Бүгүн самодеятельнай һуруйааччы көллөрөр бэйэтин «Схватка великанов» бэртээк кэпсээнин (14-15 стр.).

Һабыылаак һаҥа «Илкэн» номерыгар, Андо Соктоев «Бисер Севера» межрегиональнай выставкаттан фоторепортажа. А.Е.Кулаковскай аатынан Норуоттар догордоһууларын Дьиэтигэр буолан ааспыт мероприятияга 119 кыттааччы араас регионтан кыттыыны ылбыт. «Симэх» центр директора Яна Игнатьева этэринэн, выставка, кыттааччылар һаҥа үлэлэри оҥороллоругар стимул буолар диэн.

«Илкэн» каһыакка һуруйтарыҥ онуга аагыҥ. Биһиги изданиябытын өссүө интереснай онуга үгүс, эҥин өстөрдөөк буоларын көрдүк, бииргэ үлэлиэккэ. Ону гытта биһиги биир ааттак порталбытыгар киирэн, өстөрдө һуруйуҥ.

Валентин Хоту

Туприна П.И. тылбааһа