Өймөкөөн районун Россия Арктическай зонатыгар киллэрэри эттилэр

ИЛКЭН. «Якутская Арктика» президент общественнай организацията онуга Ил Түмэн депутата Елена Голоморева, полярниктар Ассоциацияларын исполнительнай директорыгар Алексей Минкинҥа, Өймөкөөн районун Россия Арктическай зонатыгар киллэрэргэ диэн көрдөстө. Күн таксар ыйыгар Өймөкөөн районугар, «Полис холода» VI-с марафон иһинэн ыытыллыбыт көрсүһүүгэ, регион представителлара, общественность онуга экспертар биир һүбэгэ кэлбиттэрэ, райоҥҥа арктическай территория статуһун аныырга диэн.

Голоморева этэринэн, бу һаҥа федеральнай льгота, субсидия онуга инвестиция ыларга, туризм түргэнник һайдарыгар, инфраструктура онуга предпринимательство һайдарыгар көмө буолуо диэн. Онуга, Өймөкөөн бэртээк культууратын онуга природнай наследиятын карыстыырга туһа буолуо диир. Бу инициативаны камнатарга федеральнай орган былаастарын, депутаттарын гытта үгүс үлэ барыан, полярниктар ассоциацияларын өйөбүлэ наада.

Гуманитарнай исследования института онуга агыйак аксааннак норуоттар проблемаларын гытта үлэлиир РАН директорын һолбуйааччыта Вячеслав Шадрин, эбии этэр, Россия Арктическай зоната диэн өйдөбүл һайдан иһэр онуга критикаланар. Гини атын регионнар запростарын һанатта, Магаданскай облаһы онуга Ханты — Мансийскай автономнай округу һаҥа АЗРФ киллэриэхтэрин диэн. Оччого Өймөкөөн районун киллэргэ һэпсэки буолуо диэн эттэ.

Билиҥҥи бириэгэ Арктическай зонага Һака Республикатын 13 района киирэр: Абый, Аллайыаха, Анаабыр, Булуҥ, Үөһээ Халыма , Үөһээ Дьааҥы, Эдьигээн, Муома, Аллараа Халыма, Өлөөн, Орто Халыма, Уус – Яна , Эбээн – Бытантаай.

Туприна П.И. тылбааһа