Һупкучимҥэ инэҥиҥмэн бакалдадьак

Эрэв анҥану, һупкучимҥэ инэҥиҥмэн илкэми, һэбэн һупкучимҥэлни, өөсиҥэлти  нулгэвэчиһэк төөрэҥнэтэн Өлчэн гэрбэлэ һөлнэсритэн. Тартаки ноҥарбутан мээн машинадьи Сергей Егорович Никитин һөлбуттин. Чэлэн дөөр миар надан һупкучимҥэл бисит.

Төөрэҥнэвур исамнин-ту, гулумур дуруридьур, чаникаҥалбур олдакаттит. Һиргэчиҥкэ-дэмэр  гулумур бугаскикан оорит.Этлэвур тогу дурур, төөрэҥур  ньан өөсиҥэлти муһандукутан гасчитрит, эрэк томавур оодакут гөөндэтэн. Тарак- ньун амардадукун тогур дурит, төөрэҥур, тогур мусматан һиргэтит, һупкучимҥэлбу төруттэтэн, куҥалбу иргэчидди, гургэдутэн бэлдэтэн, гасчиникан, оран имсэдьин, тэбэкэч, чаит, төйрит.

Һиргэчимур мудандун эвэди Һээдьэвур уулдуканит. Һээдьэв ҥэнумҥэ, мэргэндукуй ньөөри, ай төөрэрдьи һупкучимҥэлбу эскэрин.

Тар томавур ооддит ээлгэлин укал чаиҥат һуйэллин, дьэблэҥэт иррин. Аймакань, остолу эрээли тэгридьур, далси дэбгэлдэҥур дьэбэдилдит. Тар дапкалин һойат өөсэйникэһэл мээнэтэкэлбур, һэбдьэнь укчэнмэчэк бисин, иньинэн-дэ һойа бисин. Һоо эвэч бисин.

Далуклаа дьэбэддидьур, ньанукукан Өлчэҥтикивур гиркаснит, эрбэчил ньамтаки төөртэки дэгэлэддивчинтэн, амалта улбуҥчирит, раведкала солдатал һөрэддивчитэн, удь удьливур гирканикан. Һо бакаркичантакан, тигэкун биракчачам һоладдит. Эр ҥивут-тэ, бакаркинидьи бэлдэнэддьин, иньинэддьин. Һэббэникеее! Тачин Өлчэҥнэвур ньанукукан исрит. Һоо гудьэй һөвэк төөрэҥнэвур. Эду төиҥкэвур эмээнит, һойач фотола тикрит. Һупкучимҥэл иньинчэкэнтэн, өрэлдэчэ төөрэнтэн Өлчэн һэрдэлэн һойалбурин. Ҥи-гул укал кадарли һөвтэркэчиддин. Аикее бисин! Амаски гулунтикивур дэрбэлтэн мэринит. Ньан-да дьэбэдилрит, тардим гиркаридьур, он-а-си дьэбэмэлчэ бисит. Тачин һооч аич дэрэмкэттит.Анҥанив чөптэрэ гургэвчидэвур, эҥигэвур боримрит һөвэк төөрэҥдукур Өлчэндук. Төөҥкэривур төөрньун гочирлан простиматтит. Дьукчавур чакридьур, Һэбээҥтэкивур гуулэснит.

Зоя Степанова

Фото: Евдокия Степанова, Саина Кейметинова, Любомир Захаров, Надежда Степанова, Таисия Кейметинова, Долчаня Шангыш-Оол