Подписка

Балданҥа төөрэн инэҥидун иҥэньгидэлэ ииндиддил билэкэлдулэ дьонтуралбу таҥнитан

13.02.2024
Анҥамта укчэнэкэл

Балданҥа төөрэн инэҥидун иҥэньгидэлэ ииндиддил билэкэлдулэ дьонтуралбу таҥнитан

179

Эври миир миан илан инэҥидун Ньока төөрэҥэн Балданҥа төөрэн ньан дукун инэҥивэн илкэҥнэн.Республикала балданҥа төөрэнти декадан оваттан. Таду өмэтэл гургэвчиддил этносал бэйдьур ньэккэрэр төөрэмур дьулэски иимкэндэвур гургэлбур. Элэ билэкэлдулэ гиаки һэбдьэкэлбу ооватта,литература-да һиэсэчилбэн.

Эрэк инэҥиду Чокурдакла бисин «Балданҥа төөрэндьур дьонтум таҥадьак» гэрбэлкэн һиэсэчэн Е.Н.Горохова  гэрбэдьин библиотекаҥнатан Аллаиха улуслан.Эррөчим оорин Аллаиха улусан КМНСэлни Ассоциациян Е,Н Горохова гэрбэдьин библиотеканьун өмэтту. «Өсиҥэлбур төөрэндьитэн укчэнмэккэл» проектли. Элэ ньучидич, эвэдич ,ньокадич дьонтуралбу долчивканитан.

«Һоч өрэҥчирэм  эвэдиҥур төөрэмур һаадавур манручиддилтаки. Эли таҥнитан  «Светлячок», «Һонҥачан» гэрбэлкэн детсадалду иргэчивэддил көчукэр куҥакар, көчукэн, эгдьэн-дэ классалду һупкуттил куҥал ньан. Чэлэн 18 куҥал таҥритан,» — укчэннэн Анна-Александра Сивцева, Аллаиха улусан КМНС-эн Ассоциацияван ҥунэмэтти.

Эвэсэл индиддитэн Һэбээн билэклэн ньан эрэв инэҥу дьонтурал доорнаритан.П.А.Ламутскай гэрбэдьин һупкучэк Һупкучимҥэлни, онлайнли дьонруралбу таҥнидьур, дьаанилдур долчивканитан эвэдич.
«Төллэ -50 градус иҥэньдукун куҥал эчэл һуппкуттэ;актированнай инэҥи бисин, «Төөрэн инэҥин» һиэсэчинни  һупкучэклэ эчэ бис,теми һупкучимҥэл, эчин онлайндули дьонтуралдьи ааҥадавур, мулгаттит Куҥулдук-ньун таҥдатан эникэн гасчир, һупкучимҥэл-дэ дьонтум ичин таҥаптиван элэкэмэн куҥалду  долчивканнатан си. Тачин куҥал һупкубдэтэн,» — гөөнни мут кореспондеҥат, эвэн төөрэнни методисан Зоя Степанова.
Дукран Ирина Курилова ,тулматтан Зоя Степанова
Анна-Александра Сивцева типкэндэҥэн фотон