ЭШИ Арктикала һөлнэдьэк

Далбула би, ЭШИ Арктикатки һөллөттидьи, мэринэм.Дьөрмиар анҥани чидалан дьуллэ куҥалбу Һэбэндук, тала һупкутнэрилбу һөруми, бивэттиву. Таракам һупкучэку ҥунэмэчиддин Виктория Петровна Марфусалова, эрэв һупкучэку ноҥан тэгучэ.Тек-дэмэр ҥунэмэттэн Мария Николаевна Руфова.

Мину элэ һоч аит бакалдаритан, иак-гул бэгэн эмчэвчинни. Тадук һооч өрэҥчирэм.

Элэ ҥунэмэчимҥэньун Мария Николаевнаньун, һупкучинду гиавриньун Майа Валерьевнаньун, куҥалбу иргэчинду гиавриньун Ирина Моисеевнаньун укчэнмэттэм һути һутэн оон татаддин-иргэчивэддин дьугулин.

Математика, физика һупкучимҥэлньунни-дэ. Физика уроклан тэгэттэм, Һупкучимҥэ Ойюна Солбоновна. Аикееч урок темаван куҥалду унувканни. Би-дэ һэбдьэлридьи, куҥавчин долчиникан, конспектачиддив. Эррөчин Һупкучимҥэ муттулэ бичэ бигрэдэн, мулгаттам. Мут ач физика, информатика һупкучимҥэлэ һиладдап. Һисэчин куҥалньун бакалдаматтам, укчэнмэттэм. Би буги Һэбээҥи, Һөвки төҥэрэҥи дьугулитэн укчэнниву куҥал, һооч айавникан, долчир. Ноҥардутан тарак иак һэбдьэн бидьин гэрбэттэив би.Һупкучэктутэн 25 анҥаниҥан дьалабгиридун ааниникан дукчаи дьонтураҥи таҥрив куҥалтаки. Куҥакал мтинтэки эрэк һупкучэк ноҥардутан һойач бэлривэн укчэннитэн.

Дьуллэ һупкучэку мудакчал куҥал гиаки ВУЗалдула, ССУЗалдула таттадьур, илэ-тала аит гургэвчиддэ тик. Тарал бэкэччур Арктикаҥур аич дьоҥчир,ноҥарбутан бэй овканчадьин, бини дээмҥэ һотарандулан ньөөдэтэн-дэ бэлчэлин. Тиикэрэпэл мудакаддил-да тачин гөөнэ.

Элэ этажтандула гиаки общиналдьи тэгэчэддэ куҥал.
Би эвэди төөрэндули мастер-классу бөөдьиҥэи, амаски мэриндэи өгөрөснив,дьуткий Һэбэнтэки самолету эдэй ньаадур. Мулань. Куҥал дискотекатки һөлиҥчирэкэтэн һээдэндьиҥэвур-дэ омҥарив ньан.

Тиманни олукаду дьанилбу, һэбэмҥэл, эмридьур,өрэлдукэнитэн. Сергей Никитин,оҕымҥа, дьонтумҥа бэиҥэт асиҥчал, һунадньуми -да гастролдук мэриндьидникэн,эркэритэн Арктикав. Ноҥан Угояндула, Хатыстырла, Иенграла икэддидьи эмрин элэ. Столовайла ноҥарбутан далсич улитидьэлдитнэн ньан. Тарич поездач Якутскайтики һирунитэн.

Эчин би һэбдьэнич Арктикала һөллөтэм,куҥакалньун һаамулкуматтам.

Дьулэски эрэк һупкучэкту һодмар айу гургэгэн эйэттэм.
Урут һэрдэдун ииндьиддэтэн һиргэттэм.

З.А. Степанова