Ржев анчиндун би маврив
Ржев анчиндун би маврив
Ач гэрбэлэ ньарукагду
Тунҥи ротаду
Дьэгэнгидэлэ
Ҥэлэм кусинду
Эчу долдар тиалриван,
Эчу иттэ һутапкинчаван
Кэҥрэлэ һукэлриву
Ач һэрлэ,ач дасутиҥнала.
Эрэк төөрлэ
Бини муднилан
Усин-дэ ачча
Имэндэн -дэ ачча
Гимнастёркалав минҥилэ.
Би- баликачал ньиҥтэл бисилэтэн
Һатарсила дьэбгэлрэҥгэвур
Гэлэтэддилдулэ
Би – петух иркаддилан
Бадирап гиаван һеддэкэн.
Би -һун машиналсан
Нулум шоссела
Уулдавкандьиддилан.
Орату оратньун окат
Илчаддилан.
Тартаки эньмуд-э
Имадаи этилэн исра.
Һиилуси анҥани дьуганидун
Би мааврив. Миндулэ-укчэнэк-дэ
Этэн исра,сводкав-да этэр мэтур
Эрэк инэҥи амардадукун.
Таҥалда ,иинил.
Окараптукун амаргинук
Фронтла элэкэс
Сталинграду гэрбуритэн
Фронт кургэддин, эникэн һииврэ,
Илрэлэву мааталгичин.
Би маавриву тарбач эһэм һаара
Мутҥил-гу Ржеву гадаҥутан?
Удивдаҥатан гу мутҥил
Тала Дулаг Дондула?
Эрэк биаҕ ҥээлэм бисин.
Эрэк бисин тикйэкэн.
Адит гу тар боларлан
Дон ноҥарҥитан оорин
Колёсамакач-та бисиклэн
Волгатки гуусэснин ноҥан!
Эснее!Өлэк! Тарав эч
Булэр эттэ.
Эснее!Эсни?Тармкам
Көкэчэду-дэ оон- бидьин?
Көкэчэлдулэ-дэ
Ач төөрэнэсэлдулэ
Мут Бугур дьугудун көкэрит,
БугатАивран.чилдан.
Иасалат тоган манун
Миаванти дуррин
Һииврэн
Төөрлэ иарутми
Муту эстэн ээрир.
Мут мукалра,дьол урэчин.
Тадук-та тивнэдмэр,һатарсидмар.
Муту эрэгэр дьоҥчиридутан-
Ҥи эйэтчин тарав?
Мут илрэдьит чернозём
Дьалабгин
Мут эти бэриптэ эскэврит
Навуси ,навуси
Мут этэп һилдутта
Боевой орденалбур
Һунду иинилду эрэк
Мутту-дэмэр – өрусимэк.
Киҥкич кусидэҥнит,
Энин бугур дисутми
Дылгамур этиклэвур-дэ долдар
Һаннасан һуу.
Киҥкич стенавчин илачча
Биннэсэн һуу,гианилти.
Көкэчэл ниҥиччир-кэтэр
Тарак ҥээлэм бидьин.
Тарак наавуси
Мутньун эрэгэр бидьин
Амардадукут боддоччин-эрэк
Наавуси.
Ирэли дигэнмиар өмэн анҥанидун
Ач мола би имаврив
Тарак амардадукун
Бэкэтьбэн миндук
Көкэн дасрин.
Бэкэтькэндукун бовларин
Иав дьуллэ көйэччэукуй,оочадукуй
Тар бисиклэн тарак
Мут тэдьбэридьит бидэн.
Данилбоо,һу эчэдиснэн-ту
Дон окату бэрир
Тылду, Москва һаттун
Биникэр,
Тарав дисутми,
көкэчэр бидьис ньан.
Горла Дон далилан
Окопав ,һөлиҥчиникэн ,улрисэн
Кусиникэн -дэ Европала
исрисан.
Мутту элэкэнь һааракат
Тала бисин иаракан-да
Амаргаг көчукэн
Төөрэҥэт
Эрэк кусин һотарандулан.
Тар амаргаг
Төөркэкэн
Оон оодьин эмээнчэ-дэ бисэкэт
Тар биникэн төөри төөрэҥэт ачча.
Булэру ээсэмкэнисэн
Тикуптэтки амаски
Смоленскайу гача бичээдьис гу.
Дьанилбоо?
Булэру этэдьэс
һөттэ төөрлэ тиик,
Границатки
Аһукалбучадьис ?
Тачинту бидьин…Иҥэ
Дьалабгидьин
Һөвкидук бөбчэ төөрэн
Дьоҥчис гу Берлин
Дьугулин укал
Москва анчиндун гөөбтин.
Дьанилбоо, булэр крепсбан
Һаайучал,
Көкэчэл,тикчэл
Һөҥгарача бидэтэн!
Дабдукан һагарси иигэлни
Муту ач төөрэнэсэлбу,куйкилбу
Муту эрэгэр дьоҥчибаддилбу
Урукани бидэтэн-ул адыкунач -да.
О.һаракалбу,тэдьээрилбу
Таракам-мат кусинду
Ач мудна ньэсэҥур
Мэддиснэн милтэрэ.
Тала,тар ньэслэ
Эти етэвэбтэ
Һуҥэлэт һаанин
Көкэн тедэҥэн
Тэдьэнти,Һадаринти,эҥит.
Мутҥи бэкэтькэнти.Эсэп өлэкчир
Мут эрэк кусинду
Бэкэтькэмур бөөрит,эникэн һулара
Иав-да мэндур..
Бэкэчэн һунду таҥуптин
Дагрит эникэн бис,эрэгэр бидэн
Иинилтэки эникэн аасра
Эрэк мут дилганти ,мулгатит
Эрэк кусинду
Эчилбун дэлкэр
Көкэчэбу -дэ,иинилбу-дэ
Бэкэччур тэрэкэлдьи бисит.
Ииндьиддилдук ҥи-дэ
Наанан ачча мут дьугудут
Ҥи ҥалдукут һөвки знамяв
Тутэмнин-тэ наҥтиснин.
Совет властин дьугудун
Һөвки бөөчэн бинидут
Тачин-ту бичэ бидьин
Адыкум Һэтэкнидьи, тикчэ
Бичэдьин.
Би мааврив Ржев анчиндун.
Тарак-дамар—Москва һаттун
Илэ биһэс,кусимҥэл,илэ
Ҥи иинич эмэптин?
Миллион таҥулкан городалдула гу
Көчукэн билэклэ,дьуулаву- гу
Һаанилньумур?
Кусичэ гимнастёркавур тэтучимнин
һөнтэ бугла ?
Э.бэйҥилэт гу ,һөнтэлэ гу
Нод ньочэлкэндулэ гу,иманралкандула гу…
Ииндэсэн гасчирам
Тадук һөнтэв иав ньэкчим?
Гасчирам тала бинилэсэн
Ньэсэлкэн бидэссэн
Балданҥа бугтур
Эҥивур бөөдэссэн.
Бугур одьадасан, касагникан,
Гианилбо,-мээн ньэсур,-
Кусимҥэ акмур кэриэстун
Эньин Буги дьугудун көкэчэду.
Тулматтан Зоя степанова
