Ньока төөрэҥнэн һиги юкагирални төөрэндьитэн һойа мультфильмалбу ньөөвритэн

ИЛКЭН. Мультфильмал 10 сериятан ообтитан юкагирды дьоонтумҥа, һиги юкагирални төөрэмэтэн һөлбучэдди Любовь Дёмина куҥалду ааничан книгадукун „Ньөөлтин мунрукарни“ гэрбэдук гапчач.

Эрэк мультфильмалдук һаамулкудьир таҥамҥал иҥэньгидэ төөр дьэлгэнкэлни,һиэрилни дьугулитэн,Һаалдьир юкагир төөрэндьин дьэлгэнкэл,дэгил,олрал,магдилил,моол,тэвтэл, ньөөчэл гэрбэлбутэн.

„Би эрэгэр мулгаткарарив төөрэн-эрэк мин-ньун эникэн бис,эрэк иини,иав ичукэттин дээмҥэ бисивэн.Төөрэм аит һаалдьинни,тарав ҥэнукэм ньэкривчин унуми-ньун.Теми мин мулгандулаву эрэгэр бисин таррочин этимологическайу книгав дуктаи, — гөөнни книгакам дукча Любовь Дёмина. Һиги юкагирални төөрэндьитэн муран„йахадаасьэ“ ньучидила тулмачиндьин бидьин „ньока оранни“. Эдук унуми ай, юкагирал мурам һаамулкуритан элэ эмчэл ньокалдук итми„ньока оранни“ гэрбуритэн.

Проеку ООО„Мультидитек“ студияду НВК„Саха“ заказчин „Государственнай ньан официальнай төөрэрбу имкэндьидьэк, дьулэски ҥэнудьэк Ньока төөрэҥнэн“ программали ообтин.

Эрэк студия „Мультидитек“ Любовь Деминаньун нонап гургэтэн эсни бис. Дьуллэ өмэтту мультфильмэл-диалогал „һаамулкумачак“„Оил“,?„Инэҥтэн бинит“, „Дьоданал бадатан“ т.һ. ообтитан. Тиик-дэмэр юкагир дукамҥан гөнни студия ҥуунэмэчимҥэткин Таисия Тарабукинатки мээн книгалий этимология теман бидэн. Эрэк муданни һооч һэбдьэнь, һойав һаамулкувкани бисин.

„Һиэрил,дьэлгэнкэл, дэгил,магдилил гэрбэлбутэн ааҥами,мут ҥунмир тиитэрэп бинилэн, ииндьиддилэн, юкагир ҥунмирэҥэн тарав оон уталливан ичукэтткэн унурап. Юкагир төөрэлбэн аич унудакут, һаамулкудакут бэлрэн,иини төөрэм һаалдакут һупкуттэн,“— гөөнни Любовь Николаевна.

Дилгалкан таҥантаки юкагир куҥалбан гургэвчивкэн.Таҥритан укчэнэкэлдулэ героелдьи бис асаткачан Ярхадана, һуркэчэн Тохсю, таралбу төөрэритэн Сахая Миронова ньан, Станислав Дускулов. Автор куҥалньун гургэвчими, ноҥартакитан тииҥнэрин мээн тексалдулий аудиолбу, аит-да төөрэнмэйу таткаттин.Таду һооч бэлрин Нельимнэй дулаг Һупкучэкэн һупкучимҥэн Алена Миронова. Төөрэнтэн ньучидич субтитралдьи дэлтэ ообча бисин.

Тикэрэпту һиги юкагирални төөрэмэтэн һаарил ньуҥэн-ньун бэй эмэпчэ. Таралдук иланни Ньока төөрэҥнэн ииндьиддэ, иланни-Магадан буглан.

Эрэк тэлэҥ чэлэн сериялбан ссылкалин көйэчэлдэ>>>

Дукран Ирина Курилова

Тулматтан Зоя Степанова