Буги айавна — эрэк бэйтээндулэ биннэн

Буги миавандукур һиэрит мэргэндьур айаврил бэил эгдьэн патриотал бидьир. Иак-да-тит буги айавран: бэй били, дьэлгэнкэ били, дэги били,-чээлэн. Таррочин бэй, төөрэндьи-ткэн эникэн бис, ньэкридьи, гургэдьи ичукэттэн.

Нонапчин буги айаври бими, тарав гилбатич бивкэндьин. Иак бэкэчэн һаньилкан, бугат-да һаньинни бисни.Ньаҥсаттакат,бэкэтькэмэн һаайукаттакат Бугат һанинни аасчин.Тарак эгдьэн һиинимкин.

Иак-та кээньили бэкэчэн ньаҥсала һоргаран. Бугур, дьуувур гилбатич бивкэнми, абгарач-та бидьип. Гилбатич бини-эрэк ньан мээнэтэкэлбур төөҥкэмэттидукут, одьаматтидукут. Куҥаҥчалбур айавридукут, һааҕдыҥалбур төөҥкэридукут ичун. Тачин бими, ҥунмир дьулгидэлкэн, ирбэчэм-дэ урглбу
һиндадьин, чилдадьин, тиэми мандуридьур тачин бидэвур гуусэкэннэт.

Тимана ньөчэ качунин бианна 27 инэҥидун билэклэт стеллав ааҥадьир „Я люблю Себян“ гэрбэв ньучидич бисив.

Дьулэп эвэдит бисин „Би аяврам һэбээм“ гэрбэлкэн. Тарав-да эникэн һаайур тачин илачаддакан ибга бимчэ.

Тиикэрэп-дэмэр стелла бэкэтьтут ичуриду админинистрация дьуун тэлдэлэн бидьин. Һэбээмур айавдакут эрэгэр дьомкандьин муту. Анҥамта стелла ааҥабаддидьин өрэҥчиникэн,һокамкиттам!Аймакань!

Зоя Степанова