РФ Минобрнаукан төөрэҥнэвур дьулэптук ииндьидди адукун таҥулкан ҥунмирэлдуккун биси студелду степендятан тамман һаавдавур гөөнэ

Эрэк укчэннэн анҥантан тамапти гэрбэлкэн степендия дьугулин Россияла бисил адыкун таҥулкан ҥунмирэлдук студелду.
РФ наукан өгэв һупкучэкэн Министерствон документ проекбан оодни,студел степендиятан тамаман өгэрдэвур. Тарак таманни һаавабдьин10 тысячадук 15 тысячала. Эррочин проект дьугулин нээритэн проекал нормативнай правовой актал порталлатан.

Таррочин степендиял Евдокия Александровна Гаер (2934-2019) — историк, этнограф, археолог гэрбэдьин гэрбэлэччир. Ноҥан нанай бисин, адыкун таҥулкасал ҥунмирэлбу киҥкич элэчэндьи дисуттин.

Тиикэрэпэл правовойды акталбу адыкун таҥулкан ҥунмирэлбу дисыттилбу ообдатан һойав эгдьэм нэсээлукэнин.

Эррөчин степендиялбу бөөдьим бакалавриат, специалитет, магистратура-да студелдун адыкун таҥулкасал РФ Иҥэнь буган, Сибирьдукун, Горими Һиэптудукун ҥунмирэлдукун бисилду, тарал ҥунмирэл төөрэндулитэн, культуралитан гургэвчиникэн, һойав айу эмучэлду.
Дьуллэ „Учительская газета“ сетевойды изданиен укчэннин, Минобрнаукан гэрбэлкэн степендиялбу адыкун таҥулкасал ҥунмирэл студелдун 2022 анҥанидук тамалдаҥматан.

Эррөчим тамаптив илуритан ҥунмир искусствован һуулбимкэндэвур, ҥунмир культураван иимкэндэвур, ҥунмирэл этно культуратан һойаван, гикиван, айбан-да ичукэндэвур. Таманни ээрин бисин 10 тысяча рубль.Степендияв гарилбу һинмавраритан конкурсалбу ооникан, таду этчэлбу. 2023-24 анҥаниду 10 студем һинмаритан-эвэнкилдук, эвэсэлдук, сойоталдук.

Гаптдаҥан Учительскай газетадук
Тулматтан Зоя Степанова