Чукотка сенаторан Ньока төөрэҥмэн илун овканни дьулгирэптукун элэ индьидил ҥунмирэл асаҥалбудан төруттидьин
Федерация Советан бутун төөр ҥунмирэлни ээлгэлитэн Комитетлан биси Анна Отке Евроазия асални диги форумлатан Санк -Петербургла гургэвчилдэн.
Ҥунмирэл культуралитан,титэрэптук ньэкэнмэилдулитэн гургэвчирил асал ньунэпчэ площадкадутан Анна Отке укчэннэн дьулгирэптукун төөрэҥнэвур биддил ҥунмирэл асалбутан Россияла төрутитэн дьугулин,Федерация Советан сайтан.
„Асалбу төруттэвур Иҥэнь бугла,Сибирлэ,Горими һиэптулэ өмэн һэлки укчэнмэчэк ачча.Эррочилбэн федералал, региол, муниципалал долитан-ньун ообгаран. Социальнай экономическай бинит һөнтэкин,эррөчилбэн гургэлбу гаптиндун көйэчиптэн. Тачин-да бисиклэн өмэн һэлкич асалбу төруттэвур мандуттап ньимкрэлбу, куҥалбу. Нулгэвэтти ньимэр асиҥан дьулдэлэн дьуйи оочарурин, тала бинив тэгурин илаттан.Асидук ээрибдьин ҥунмир культураван иимкэндэн,нунмир томалбан,иткылбан, төҥкэкичэлбэн тадук-та һөнтэв нөсэҕчэрду эмээндэн,“ — илкэнни Анна Отке.
Сенатор ньан аавдаттан,дьулгирэптукун төөрэҥнэвур индьиддил ҥунмирэл культуратан ииндэн аси мандучаннаван, асал бидьир нонапла көчукэн бизнесу һуулбимкэндулэн. Таду ньэктэтэн асалду финансовай бэлэн биннэн: буйустэтэн, олраматтатан, орам-да иргэтэтэн,нанралбу ииникэн, оилбу һаҥандатан. Эду ноҥардутан эгдьэнэч бэлдьир регион, федерал грантални.
Анна Отке укчэннэн ньан Россияла гиаки программал бисивэтэн итулбу гапчаватан,асалбу
төруттилбу,ноҥартан ньимэрэҥур, нулгэвэчин томалбан дьавататан.
Тачин Ямало-Ненецкэй АО-ла „Чумовой капитал“ бисивэн — эрэк программа һойа һурэлкэн нулгэвэчидди ньимэрэлбу төруттэн.
Ньимэрэлду чумовой капиталу бөөврэчэл или куҥатан балдаракан, иргэттэвур-гу гаракатан-да,амаргаҕ һурэлдутэн ньан бгөдир бэлэм. Тарак капитал 500 000 рубль. Тарич ньимэрэл дьугавур оодьир,туркилбу т.һ дьо даналгавур.
2016 анҥанидук Ньока төөрэҥнэн „Нулгэвэттил ньимэрэл“ итун гургэвчин, программа „Нөсэҕчэн оралчимҥа“ бисни ньан.Нөсэҕчэн оралчимҥалду тамам бөөврэр, дьугавур оодатан.
Чукоткала һуулбимкэнитэн нулгэвэттил ньимэрэлбу төруттивур, дэрэмкэттэтэн тамам бөөр. Гиаванираптук таррочин бэлэм пенсионералду-дэ сельхозла,общиналдула дьуллэ гургэвчичэлду.
Федерация Советан пресс-службан фотон
Тулматтан Зоя Степанова
Также по теме читайте:
