Өтэрэп штамп иав дьомканни

ИЛКЭН. Далбула “Комсомольскай правда” редакциялан Алексей Кравченко иирин.Ноҥан ичукэнин открыткалбу,конвералбу(оҥьачалбу,дукун тэпкэлбэн) “Иҥэҥьгидэ полюс”станциял печаталкасалбу, Дигэн столбалкан полярнайды букчанни станцияҥив тадук-та һөнтэлҥив.

Мин амму Василий Афанасьевич ЛИ-2,ИЛ-14 борт радисчин гургэвчирин,һойаракан дэггөткэрэрин мөөли тиамачидди “ Иҥэньгидэ полюс”станциялтики,полярнайгидатки -да станциялтаки бөкэсли муйичинмэйли гургэвчирин.Ноҥан печаталкан дукун тэпкэлбэн эмуврэрин.Далбула, һаан дьоданалби чакатникан, таралбу бакрин,- укчэннэн Алексей.

Дьалабгидип эду, советскай бини һээдун Арктикала  һойа станциял биситэн, тарал букчардула илатитан ньан Һэргэҕ Кулума райондулан.” Иҥэньгидэ полюс “ гэрбэ, намни тиаматникан, муйитти научнай станциял гургэвчиритэн. Тала гургэвчимҥэлдьитэн биситэн  гиаки специалиһал.Эникэн мудна метиорологическаил, геомагнитнаил, гидрологическаил мучинмэил ообгараритан.Таралду бэлритэн  Кулума- Индигир һамулдачатан дэгэнмэттил отрядал.

Станциялдула илкэр илупчал биситэн, таралдук һипкатми, таррочин СП штемпелэлкэн, ирэк-вул полярная станцияҥи гэрбэлкэн  дукун тэпкэҥэлкэн, открыткалкан-да бими- эрэк һойа бэй мэргэндулэн биси эйэтти мулгур бичэ бидьин.Эррөчин  иав-вул һоо эгдьэм һуҥдиһинчэ урэчинни бичэ бидин, асун-да горла этиклэн бис, тар биникэн экич искинна тартаки.

Һупкутти биҥсий би радиокружокли нькри бисив,инженер КИОАО Михаил Филиппов  тарав ҥэнуврэрин. Мут көчукэн схемалбу — приёмникалбу, мультивибраторалбу паяльникач һорукаткарарит, һаҕдыл гинилти радиов айаврил иэсчимэчэкутэн көйэткэрэрит.

Эрэгэр дьумаврарин таррочин радиокружокалтаки  бортрадиһан Иван Иванович Жуков.Һадун ноҥан муттэки укчэнгэрэрин Иҥэньгидэ нам ойдэлин “ Иҥэҥь полюс” станцияткин дэгэнкичи дьугулин.

Эрэк дьугулин мину дьомкан эрэл илкэр (печатал).

Эвэдилэ тулмачивчаван долчилда:

Дукран Алексей Курило, фотолни-да ноҥҥин

Тулматтан Зоя Степанова