Хатыстырла лингвистал экспедициятан гургэвчин

ИЛКЭН. Алдан улусан Хатастыр билэклэн ойчири билэн 31 нэҥидукун ойчири иэчэн 3инэҥилэн истала лингвистал экспедициятан һөллөттин. Элэ экспедицяла биситэн эвэнки төөрэмэн СВФУлэ студелду һупкутти Надежда Прокопьевна Николаева студелньун Ляридо Игнатенконьун ньан Яна Данилованьун. Ноҥартан иимкаттидьитан бисин Эвэнки төөрэмэн һаарилбу дуктавур, ноҥартан һиньаматан-да, видео материалалбу-да тиитэрэп дьоданал, гургэвчири-дэ дьооданалтан, оилутан-да дьугулин чактавур.

Экспедиция гургэвчимҥэлни билэк һаагдыҥалдулатан дьуумаритан Стручков Влвдимир Иннокентьевичтаки, Гаврильев Олег Андреевичтаки-да. Гиадмар инэҥиҥдур упэнил “Дылача” гэрбэлкэн титэрэп томалбур оомкиҥтакитан һөллөтитэн, тарал спортсмел илрэвутэн айҥурири томав ооритан, Россия биотлонистални чакапчавутан элэ ньан эркэчэлбу.

Ҥунмирды ҥэн очимҥадун Надежда Михайловна Григорьевнала укчэннин, ичукэнин-дэ һойа бисин, Ноҥан одаҥални дьоданални республика ойлин һааврил. Ноҥан ҥунмирэл элгэлитэн бичэ выставкалдула, ҥунмир ойилбан ичукэнидьи, һойаракан эттин, призёр-да оорин.

Мутту эвэнки төөрэмэн һаари бэиҥэлти адыкундукутан наавуһи тар биникэн, бэй этҥэн һоокатта тарит. Лариса Авангардовнаньун төөрэридьи өрэмкэнни экспедиция бэиҥэлбэн. Һупкуттил Степанова Ганна (нунмирэл элгэлитэн балданҥа төөрэндули олимпиадалду абсолютнаич этчэ) ньан Стручков Антон балдача төөрэндьур номералбу ичукэнитэн. “Эннэкэн”ҥунмирды ансамбльньун эдэҥэт бакалдаматта мулань, ноҥартан Алдантаки практикала һөрчэ биситэн. Тарит өмэн өруси бичэвэн дьоҥчибдьин ноҥардутан.

Эрэк “Бута” этно-стойбищала һөллөчэтэн, билэктук ады-да километр горла бисилдулэ. Тала орал, нод мокиҥа, национальнай дьэбгэлдэ биситэн. Эдук һулэк иак бидьин эвэнкил бинивутэн муичэддэлдулэ. Эвэнки ач орна ҥи бидьин?

Экспедиция бэиҥэлни эртэки һөллөччэдьур өрэҥчичэдьир, оодьиҥавур бэкэтьбэн дьалабгича бидьир мулгаттап.

Дукран В. И. Стручкова Хастырдук, 20-с һупкучэк һупкучимҥэн

Тулматтан Зоя Степанова.