“Илкэн 25 анҥанин. Эрэк анҥанилду һойав орап, дьулэски -дэ оннат…” Эрэк дьугулин таҥалда ойчири иэчэн биаҕтун нөөчэ “Илкэндулэ”

Ай инэҥич, төөҥкэрит таҥамҥал, дьаанилти, гианилти-да!

ГАУ Ньока төөрэҥнэн “Сахапечать” республикали “Илкэн” газетан эври иэчэн биаҕтун ньодни.

Дьоомкандьип,  издание гэрбэн эвэнки төөрэндукун ньучидила тулматми һиакитала игаһапча “затесь,”знак” гэрбэв ичукэттэн. Нонап “Илкэн“ номеран республика ойлин ньөөрин 1999 анҥани ойчири билэндун, теми мут 25-ти дьалабгин.

Иэлтэнчэ неделяду Якутскайла “Тугэни Ньока төөрэҥдэкун нонаплаттан” гэрбэлкэн анҥантан оори фестиваль ааҥаптан. Эли ооритан ҥунмирэл ээлгэлитэн бисив бокэстук, иманрадук скульптуралбу оонду иэсчимэчэку” Ньока төөрэҥэн мэҥэлни” (Бриллианты Якутии) гэрбэв. Тали ньэкритэн ньока  төөрэҥнэн ииндьиддилтэкэнҥэнэл  эникэн бис, бугат  һөнтэл-дэ региолдукутан тарал коллегалтан ньан Монголиядук, Китайдук.

Чэлэдьур, һооч һэрвиҥтэникэн, миаҥчиникан, “Энеси  Халан” Апполлон Ильинов гэрбэдьин Раиса Ильинова общинан оралбан иинич  көйэттитэн. Эрэк дьугулин Фоторепортаж газета ”Илкэн” анҥамта номербан ааҥан.

Эмни неделяду столицалат гургэй ааҥадин ньандакайа РФ эвэһлбэн чакча эгдьэн чакабак  Ньока төөрэҥэн Арктикан 12 региолдукун, Чукоткадук, Магадандук, Камчаткадук, Хабаровскайдук. Эрэк һоо эгдьэн, надалкан чакабак.

Тадук часки ньан Ньока төөрэҥнэн ииндьиддил эвэсэлни эгдьэн чакабаклавур (съезла) эмдьир. Дьулллэ оодаҥур гургэвур дьугулин, дьулгидэвур-дэ укэнмэттивур амардадуун эвэсэл һинмадьир  анҥамта ҥуунэмҥэв, Эвэһэл Союзатан-да правленяҥган(2,3 стр)

Эрэгэр биһивчинни ньучидич-та КМНС-һэл төөрэрдьитэн анҥамта укчэнэкэл бис 2-5 страницалдула. Тачин далбула этонографическай Семён Курилов гэрбэдьин музей Һэргэҕ Кулума Андрюшкино билэклэн 30 анҥанин дьалабгирин.”Ханидо ньан Халерха” гэрбэв ромам дукчча бэй гэрбэдьин музей дьулэпэн, тиикэрэпэн-дэ дьугулин укчэннэн директор Алиса Черняева.

Полиметаллическай холдинг “Селигдар” Алдан районни Беллетскай эвэнки билэкэн ээлгэлитэн  гиавникан ҥалур тинимэттэ. Эрэк  элэ ииндьиддилду айу-ньун эмудьин (5стр).

Иак гэрбэн “Чоҕчал” Маргарита  Вырдылина, куҥал ансамблитан ҥуунэмэчимҥэн, Һэргэҕ Кулума  Андрюшкино билэктукун, фольклору, көплэчинду һупкутти оҕын һупкучэктукун? Таҥалда, хойав һаамулкудавур, Ирина Курилова интервьюлбан (8-9 стр).

Мут газетаҥнат “Илкэн”  ньан траррочин гэрбэлкэн порталла ньөөвдэҥут һипкачалда  буйул дьуу оралбан һөөтуһундэҥэтэн дьугулин. Эрэв орам-да иргэчин дугулитэн таҥалда 11 страницала.

Иэлтэндьидди високоснай анҥани, һойав һиилусив эмудни дьулгирэптукун элэ ииндьиддил этносал литератураҥдутан, культурадутан-да.

Тачин мут бэрирэп һааври һоони бэиҥэлбур:эвэнкийкав Людмила Алексеевав-Геаван (НВК” Саха”), Николай Калитим, эвэнки дукамҥаван, Ньока төөрэҥэн КМНС-һэлни Ассоциациявутан тэгучэлдук гиадмару, Варвара  Даниловав, эвэнкийка, дукамҥав, “Илкэн“ нонап редакторбан, Анатолий Степанов- Ламутскайу, дукамҥав, Эвэсэл Союзатан ҥуунэмэчимҥэвэн, оҕымҥав.

Навуси таҥум дьалабгин Гаврил Курилов-Улуро Адо, юкагир ҥунмирэн һоони   бэиҥвэн, учёнайу, философу, публициһу, гургэлбэн төөр ойлин һаар…

“Илкэн” газета 25анҥанин дьугулин материалу Варвара Данилова дуктаҥман муттэки мултурин филология наукан  докторан Юлия Хазанкович М.К.Аммосов гэрбэдьин СВФУ-дук ”Һуу дьооҥчилда … һуу бэкэтчур иаракан-да дьооҥчича бичэдис…” (стр.12-13)

“Ноҥан мэргэндукуй бинив айаврин” эррочин гэрбэлкэн  ноҥман дьоҥчиривур дугулин, дьонтуралбан-да чакабчавутан таҥалда 14-15 станицалдук.

Эти омҥапта дьооҥчипти бидэн ноҥардутан…

Дукукалда,таҥалда “Илкэм”. Дукукандьиснан  сайтли. Почтали Россия,  Печать дьуун редакциялин.

Тадук һөөнтэн  иивэчилдэ, анҥамта укчэнэкэлбу дукалда проталлат-да”Илкэндулэ”.

Дукран Валентин Хоту,тулматтан Зоя Степанова.