Россия эвэсэлни ньуҥи съезтур укчэнмэттэ

Россия эвэсэлни ньуҥи съездутэн ойчири мир биаҕан ньуҥэн инэҥидун СО РАН ИГИ ПМНС дьуудун эвэн төөрэнни, культуран-да ичин бисивэн,дьулгидэвэн-дэ, мэрэти столу эрээли тэгэтникэн, укчэнмэттэ. Тарав ҥэнуритэн филология  наукан кандидатални, ИГИ ИПМНС СО РАН иҥэҥьгидэ филологияван ҥунэмэтти Сардана Ивановна Шарина, иҥэньгидэ филология  кафедран ИЯНК СВ РФ М.К.Аммосов гэрбэдьин  СВФУ профессоран Варвара Григорьевна Белолюбская.

Балданҥа төөрэн ичин ииндиддин- эрэк Иҥэнь төөр ҥунмирэлни чэлэдьур һиилгатан. Чакучал бэкэччур илкэнитэн анҥантан төөрэри бэил адыкулбуддиватан. Сардана Ивановна мэрэти стол гургэвэн тикэрэпту эвэн төөрэнни эвэсэл ииндидитэн тунҥан региондулан ичин бисивэн укчэнни докладчи ааҥадни.Тарак муданни: эвэсэл киҥкич иавда-гул эсэкэт ньэкрэ төөрэнти бэрибэндулэй исчиҥа. Элэ бичэл һаан бэил илэ-вут-тэ төөрэмур иимкэндиддивур гөөнэ,тар биникэн таррбачан абал.

Чукоткадук һөллөтти Аркадий Тарабукин фильмэлбу эвэдилэ тулматтий укчэнни.Семён Губичан Магадан бугдукун һөллөтти, эвэдиҥи иимкэндэй, дьонтулбу, икээлбу-дэ дукран, тулматтан-да .Магадан театрлан ноҥан эвирин спектаклил “Мэҥэн маска”премияч илкэмгэрэр. Мария Корнилова, Оҕын фольклор-да дьоҥчидьак дьун ҥунэмэчимҥэн, мультфильмалбу Ньока төөрэҥнэн ииндиддил ҥунмирэл төөрэндьитэн оорий укчэннэн. Илаан Попова “ Кындыкан “ проеки дьугулин укчэннэн. Һан бэил докладаҥур мэр балданҥа төөрэндьур таҥритан, тачин ньан төөрэнтэн дьулэски ииндьиҥэвэн ичукэнитэн. Эрэк өруси.

Мэрэти столу эрээли гургэ муднидун, эскэри илкэрбу дьавуканитан. “Эвэн ҥунмирэн дьулдэдун киҥки гургэ” гэрбэч илкэмритэн Варвара Белолюбская, Галина Слепцова, Антонина Винокурова. Һойал делегатал аанимритан почётнай грамоталдьи.

Проект резолюции круглого стола

Дукран Андрей Исаков,
тулматтан Зоя Степанова

Эвены: Языковая и этнокультурная ситуация