Анҥамта анҥаниду Угоянду, Хатыстырду-да ааньирал

«Селигдар», «Полюс Алдан» ньан Беллетскай эвэнки наслеган ээлгэлитэн, Алдан улусан билэкэлдулэн Угояндула, Хатыстырла-да ииндьиддил бэил бинивутэн айҥуридавур айчирилбу гургэлбу ньэктэвур укчэнмэттуҥур дьалабгир. Тачин ПАО «Селигдар» Угоянду моторнай момив (өлдэв) ньан моми моторбан гадатан бэлрэн. Эчин бэлдэҥэтэн тэгэлэ биси билэклэ ииндьиддил һөнтэлньун бивэтмэттидуттэн, гиаки дьодаҥалгавур дьугуттидутэн, иак-та гул ҥээлэм ооракан айдатан ибга гөөникэн укчэннэ Беллетскай наслег администрациялан.

Ньан гиадмар өруси укчэнэк бисни. Угоян Хатыстыр-да клубалдун анҥамта дьоданалгавур гадатан бэлрэн АО «Полюс Алдан”. Эррөчин проеку компания ҥунэмэтти директоран Евгений Васильевич төррэн. Эчин клуб дьоданалбан анҥамталтадаҥатан гиаки мероприятиелбу оптиван айҥуридатан, дээмҥэлтэдэтэн-дэ коллективал ньан куҥалнюн-да гургэвутэн өгэски ҥэнудьин. Инвестициял культуратан, бинитэн дьулэски ҥэннидун айдьир.

Эрэк ичукэттэн бизнес төөрэми дьаваттиван ньан тарак дьулгирэптукун элэ ииндьиддилньун уйулдутивутэн маҥурун. Угоян-Хатыстыр билэкэлдун эрэк эгдьэн бэлэн бисивэн илкэнитэн.

Марина Коренева

Тулматтан Зоя Степанова.

Фото: Администрация МО «Беллетский национальный эвенкийский наслег»