Иҥэнь буг нодыван ичукэнил өгэв гургэл

ИЛКЭН. Һэргэҕ Кулумала титэрэпу дьоҥчидьак ньан Иҥэнь буг ҥунмирэлни культуратан дьуулан Дарья Николаевна Курилова гургэлбэн ичукэндьиддэ. Эрэк инэҥилду дьоҥчидьак дьуун иинин ичуснэн, юкагирал һааҕдыҥатан гургэлдьин милтэрээми.
Тар һаҕдыҥатан бинин-маҥси мэргэн, ҥунмирэҥи томалбутан киҥкич дьавачинду илун. Ноҥан 83 анҥаниҥди һойав гургэвчиникэн, гиаки дьоданалбу ооникан биддэн. Илан нөөнулэл Куриловал өмэтту балдадаҥатан аси, колхозту-совхозту гору анҥанилбу гургэвчичэ, юкагир төөрэмэн, культураван һөлбучэдди, юкагирал ҥунмирды икээвэтэн аит һаари, икээри, ҥэн ҥаалалкан, эвэды-юкагирды «Ҥэривдэн» (Заря) ансамбльду биси.
Ичукэнэклэ илуритан дьөөрмиаклидук һулэк гургэлбэн-таралдук өмэтэлэн шедевр, ҥэн аси ҥалалдьи оодаҥан. Тарал доолатан панно, нисач һэрээпчэ, ньучи томкичадьин-да мулинеч, тэргэс гиратлалдьин аппликациял, инҥаттук кумалан, Андрюшкино билэкэн 75 анҥаниҥдун ааньипча, балданҥан дэтлэ ииндьиддил бэил бинивутэн укчэнни. Таралдук ээрипчиҥэлтэн юкагирал дьоданалтан: моҥо-аавун дьугарап унта кулубэ, тэргэстук һаирал, оранду инурилтэн эмгун, һэрукэл-дэ.
Һэргэҕ Кулума бэиҥэлни эрэк ичукэнэку итнэдьир һээйэ биаҕтун, мээнҥидьур иасалдьур көйэччир юкагир ҥунмирэн өөсиҥэлни эмээндэҥутэн дьоданалбу. Дарья Николаевна юкагир асалдукун гиадмаратан Андрюшкино билэклэн балданҥа төөрэндьи укчэнмэтти, ҥунмирэҥи культураван томалбан аит һаари.
Чэлэн төөҥкэкичэлбу, ҥунмир оонмаилни томалбан эникэн һөөнтэлтэр, уйур мээндьи оори, мээндьи мэргэндьи юкагир төөрэмэн,культураван, куҥалбу дьуулай чакникан, һупкутти. Дарья Николаевна Ассоциация, Ньока төөрэҥэн юкагирални Һаҕдыл Советатан гургэдутэн бэлри ньан ноҥан Тэки Одулок гэрбэдьин республика премиян лауреатан. Ноҥан һупкучэкту, юкагирал Суктуулатан-да администрациядун бэлрэн, мээн дуус һавайи, мулгури нээникэн.
Ирина Курилова
Зоя Степанова тулматтан
Читайте также:
Анна Васильевна Курилова и её песни: взгляд в прошлое юкагирского народа
Этнографический музей имени юкагирского писателя С.Н. Курилова: история создания
Николай Курилов: Вдохновение меня никогда не покидает