Колымское билэклэн оочав һиилгав аавдаттавур гаритан

Һэйэ 21 инэҥидун Арктика дьулэски ҥэннивэн, Ньока төөрэҥэн Иҥэньгидэн ҥунмирэлни бинилэвур ньэкритэн Министерстволан укчэнмэчэк бисин Һэргэҕ Кулума районни Колымское билэклэн бэил тэгэтти дьуугатан тадук-та һөнтэ социальнайды дьуулбу оочидьак дьугулин.

Министру гиаври Михаил Погодаев укчэннидьин, чакабакла биситэн һөнтэки министерстволдук, ведомствалдук ньан билэкэл администрациял дукутан, райолдук-та бэил. Элэ бичэл бэил гөөнитэн һойа квартиралкасал дьулбу, өмэтэлдьи-дэ ньимэрдьи тэгэчиптилбу дьулбу һэйэ 17 инэҥидун бичэ дуриду 12 квартиралкан дьуувур тиэтэвчэлду ообдьиҥаван.

Ньан ититэн тэгэтти дьулбу бутун республикали гапча “Мин Ньокаҥу төөрэҥэн 21 векту” программа доолин обдьиҥан элэкэмэн.

Гөнитэн ньан көчукэн куҥакарбу иргэчиҥкэньун һупкучэк һамилик дьууван 80/40 миэстэлкэм одавур проектно-сметнай докумеҥан дукабдьиҥан элэкэн биннэвэн. Чакучал гөөнитэн Колымское чукчады породан орман иргэчиддил, чукчал ииндьиддитэн билэкэтэн элэ өмэккэн бисивэн. Билэк РФ-ияла Иҥэнь буг, Сибирь. Горими һиэпту дьулгирэптукун тэгэттил адыкун таҥулкасал ҥунмирэлдулэтэн бисил чукчал билэкчитэн таҥуттан.

Михаил Погодаев илкэнин Колымское билэклэн дьуулбу оочидьак гургэн дьулэски-дэ һиракабдьиҥаван.

Тулматтан Зоя Степанова.